Napiaredadni vystupu hurtu «Neuro Dubel» prajšła chvala zabaronaŭ na kancerty inšych biełaruskich rokieraŭ. U Mazyry admianili kancert z udziełam «Indiga», čynoŭniki z upraŭleńnia kultury Mienharvykankamu admovili «Kramie», byŭ zabaronieny sumiesny kancert «Zet» i «IQ48». Apošnija ŭsio ž vystupili ŭ inšym klubie, ale na arhanizataraŭ skłali paśla pratakoł za «arhanizacyju niesankcyjanavanaha mierapryjemstva». Navat kancert barda Alesia Kamockaha ŭ Maładečnie admianili ź niezrazumiełych pryčynaŭ.
Solny vystup «dziubielaŭ» u piatnicu 28 traŭnia, prymierkavany da 35‑hodździa Alaksandra Kulinkoviča taksama byŭ pad pytańniem. Miesca praviadzieńnia mianiałasia trojčy i kančatkova vyznačyłasia za try hadziny da pačatku. Infarmacyja pieradavałasia z vusnaŭ u vusny. Biez anijakaj reklamy ŭ adzin ź mienskich klubaŭ nabiłasia sto čałaviek. A.Kulinkovič pierad vystupam vyhladaŭ stomlenym: «Kolki ŭžo možna biehać i chavacca?!» Na tancplacy jaho hadzinu čakali addanyja prychilniki — pačatak kancertu pasunuli, kab paśpieli sabracca ŭsie žadajučyja. Na kancertach «dziubielaŭ» možna sustreć i niapoŭnahadovych pankaŭ, i prystojna apranutych menedžeraŭ siaredniaha źviana. Jak muzyki zajhrali «Vitalnuju», i tyja, i tyja nasunulisia na nievialičkuju scenu dy puścilisia ŭ šalonyja skoki. Sekjuryci razyšlisia: achoŭvać «dziubielaŭ» ad prychilnikaŭ niama sensu.
Na vinšavańni z narodzinami Kulinkovič reahavaŭ strymana: «Usio b addaŭ, kab znoŭku stać dvaccacihadovym». «Dziubiel» nie źmianiajecca ŭžo vasiemnaccać hadoŭ. Chiba sam Kulinkovič, jakoha prychilniki zavuć prosta Kuł, užo mieniej skača pa scenie. Ale usio adno na «ŭra» zachodziać i staryja hity, i novyja. Na «Pierajechała kambajnam» zala padchoplivaje za druhim vakalistam Paskudam niemudrahielisty prypieŭ: «Ła‑ła‑łaj‑ła‑ła!» — raznosicca daloka za miežy klubu. Novuju pieśniu pra pi..rasaŭ, jakija «pjuć harbatu i słuchajuć Racyju‑FM», publika žyva ŭsprymaje i schodu vučyć słovy.
Siarod hledačoŭ, jakija paraźbirali niatannaje piva, chodzić Aleh Chamienka z kubkam harbaty. Kulinkovič zaprašaje lidera «Pałacu» na scenu, i jany zaciahvajuć «Huzik» na try hałasy. Hradus viesiałości spadaje tolki na surjoznych, trahičnych pieśniach — «Žyćcio», «Kraj».
«Neuro Dubel» hraje kancerty na adnym dychańni — non‑stopam, jaki pieraryvajuć chiba vieršavanyja zaciemy Kulinkoviča pra prastytutku, što čakaje «čyrvonaj armii synoŭ» i busła — «seks‑symbala Biełarusi». Bieskampramisny vykanaŭca klaniecca ŭ lubovi da krainy. Krainy, dzie viadučy rok‑hurt vymušany nie afišavać svaje vystupy ŭ padpolnych zakusačnych.
