Sudździa sudu Savieckaha rajonu Miensku Aksana Relava razhledzieła dva administracyjnyja pratakoły (za «Čarnobylski šlach» 26 krasavika i akcyju suprać skasavańnia ilhotaŭ 20 traŭnia) na aktyvistku niezarehistravanaj arhanizacyi «Małady front» Ludmiłu Atakułavu i pakarała jaje štrafam u 25 bazavych vieličyniaŭ — 775 tysiač rubloŭ.
Ludmiła Atakułava była na zaniatkach u toj čas, kali pa jaje pryjšli milicyjanty. Jany patłumačyli, što joj nieabchodna prajechać ź imi ŭ RUUS Savieckaha rajonu Miensku. Tolki tam Ludmiła daviedałasia, što jaje abvinavačvajuć ŭ tym, što jana stvaryła kalonu i arhanizavała niesankcyjanavanaje šeście paśla taho, jak akcyja «Čarnobylski šlach» skončyłasia.
Taksama na Ludmiłu, adzinuju siarod zatrymanych padčas akcyi 20 traŭnia, skłali pratakoł za arhanizacyju niesankcyjanavanaha šeścia. Varta skazać, što akcyju 20 traŭnia supracoŭniki milicyi praduchilili, tak što šeścia jak takoha nie było. Havoryć Ludmiła Atakułava:
«Ja nia viedaju, jak heta patłumačyć. Heta vielmi dziŭna. Ja nie była niejkaj admietnaj asobaj jak padčas pieršaj, hetak i padčas druhoj akcyi. Ale lohiku ŭ dziejańniach našych specsłužbaŭ šukać nie davodzicca».
Siabry Ludmiły pryjšli da budynku sudu, kab padtrymać jaje. Siarod ich byŭ były kiraŭnik «Maładoha frontu» Pavał Sieviaryniec, Barys Harecki, Nasta Pałažanka, a taksama aktyvisty z rehijonaŭ. Pavał Sieviaryniec ličyć, što preventyŭnaje zatrymańnie i asudžeńnie Ludmiły Atakułavaj jość sprobaj ŭłady zapałochać moładź, nie dapuścić schodu kala budynku sudu Savieckaha rajonu 28 traŭnia, kali pačniecca sud nad maładafrontaŭcami.
