Na nastupnym tydni ŭstupajuć u siłu praviły, što dazvalajuć prymać biełarusaŭ, ukraincaŭ i rasiejcaŭ na sezonnyja pracy ŭ roznych sektarach haspadarki — abvieściła ŭ sieradu ŭ Bruseli polskaja ministarka pracy i sacyjalnaj palityki Anna Kalata.
Na siońnia takaja mahčymaść dla biełarusaŭ isnuje tolki ŭ sielskaj haspadarcy. U žniŭni minułaha hodu Kalata padpisała pastanovu, što vyzvalaje hramadzianaŭ Biełarusi, Ukrainy i Rasiei ad abaviazku atrymlivać u halinie sielskaj haspadarki dazvoł na pracu, košt jakoha składaje kala 300 dalaraŭ. Pracavać takim čynam biełarusy mahli nia bolš jak try miesiacy na praciahu paŭhodu.
Ciapier pastanova minułaha hodu pašyrycca i na inšyja haliny polskaj haspadarki. — Miarkuju, što pastanova budzie padpisanaje na nastupnym tydni i ŭstupić u siłu ŭ dzień padpisańnia — skazała ministarka na pres‑kanferencyi paśla spatkańnia ministraŭ pracy Eŭraźviazu.
Jana patłumačyła, što rašeńnie prymajecca ŭ adkaz na hałasy pracadaŭcaŭ — asabliva ŭ sektary budaŭnictva — jakim nie chapaje pracoŭnych ruk. «Budaŭničaja halina zajaŭlała da rašeńnia pra arhanizacyju Eŭra 2012 u Polščy pra patrebu ŭ 200 tys. čałaviek. Ciapier ličba ŭskočyła da 300‑350 tys. u adnym tolki sektary budaŭnictva darohaŭ» — patłumačyła ministarka. Zhodna ź ciapierašnimi praviłami, u Polščy biez dazvołu na pracu mohuć prymacca hramadzianie ZŠA, Kanady, Aŭstralii, Novaj Zelandyi, jakija navučajuć svajoj rodnaj movie, a taksama studenty, jakija pracujuć u miežach stažyroŭki.
Z 1 studzienia 2007 hodu dazvoły na pracu niepatrebnyja taksama hramadzianam dziaržavaŭ Eŭraźviazu. U minułym hodzie ŭ Polščy zamiežnikam było vydadziena bolš za 10 tys. dazvołaŭ na pracu, najbolej ukraincam, vjetnamcam, biełarusam i niemcam.
