24 traŭnia

Prychilnikaŭ zachavańnia lhotaŭ aštrafavali

Aktyvistam moładzievaha demakratyčnaha ruchu Janu Michajłavu i Mikołu Koršunavu sud Maskoŭskaha rajonu Miensku prysudziŭ štraf pa 10 bazavych vieličyniaŭ (310 tys. rubloŭ). Maładzionaŭ zatrymali specnazaŭcy 23 traŭnia paśla akcyi pratestu suprać skasavańnia lhotaŭ na płoščy Niezaležnaści.

Zatrymali Ludmiłu Atakułavu

Milicyjanty zatrymali aktyvistku niezarehistravanaha «Maładoha frontu» Ludmiłu Atakułavu u Biełaruskim dziaržaŭnym ekanamičnym universytecie, dzie jana vučycca. Ludmile patłumačyli, što jana ździejśniła pravaparušeńnie i advieźli ŭ sud Savieckaha rajonu. Sudździa Aksana Relava razhledzieła dva administracyjnyja pratakoły (za «Čarnobylski Šlach» 26 krasavika i akcyju suprać skasavańnia lhotaŭ 20 traŭnia) i pakarała jaje štrafam u 25 b.v. (775 tys. rub.).

Uzialisia za ZBS

Z ranicy siemiarym moładzievym aktyvistam telefanavała supracoŭnica mienskaj prakuratury Viktoryja Kuchta. Im było prapanavana źjavicca ŭ prakuraturu dla razmovy pra dziejnaść studenckaj arhanizacyi «Zadzinočańnie biełaruskich studentaŭ» (ZBS). Pry hetym spn.Kuchta nie paviedamiła, u jakaści kaho jany zaprašajucca. Maładyja ludzi vyrašyli, što pojduć u prakuraturu, tolki kali buduć mieć aficyjnyja pozvy.

Abaroncaŭ Horadni papiaredzili

Kala dziasiatka maładzionaŭ pratestavali suprać razbureńnia budynku paravoha młynu ŭ Horadni. Kali pratestoŭcy ŭvarvalisia va ŭnutrany dvor budynku, milicyjanty zatrymali 13 čałaviek, u tym liku 4 niepaŭnaletnich. Piacioch adpuścili biez sudu. Sudździa Maciajuk aštrafavaŭ aktyvista Partyi BNF Maksima Hubareviča na 10 b.a. (310 tys.rub.), astatnim vynies papiaredžańni. Moładź źvinavacili ŭ praviadzieńni niesankcyjavanaha pikietu.

Zabity siabra Partyi BNF

U Žłobinie na terytoryi składoŭ miascovaha pradpryjemstva «Ahrahandal» znajšli cieła siabra Partyi BNF Arkadzia Liskaŭca. U jaho byŭ mocna pabity tvar i prałamany čerap. Sp.Liskaŭcu było 53 hady. Jon byŭ žanaty, mieŭ dvaich dziaciej i ŭnuka. Śledčy miarkuje, što A.Liskaviec zvaliŭsia i zabiŭsia sam. Siabry ž ličać, što jaho mahli zabić rabaŭniki.

25 traŭnia

Kaciaryna Sadoŭskaja na voli

Z homielskaj žanočaj turmy na volu vyjšła pravaabaronca Kaciaryna Sadoŭskaja, jakuju pakarali dvuma hadami źniavoleńnia za abrazu A.Łukašenki.

«MF» nie zarehistravali

Upraŭleńnie justycyi Mienharvykankamu admoviła ŭ dziaržaŭnaj rehistracyi «Maładomu frontu», spasłaŭšysia na nieadpaviednaści ŭ Statucie. Minjust spasłaŭsia na toje, što, zhodna sa Statutam, padadzienym na rehistracyju, kiraŭničym orhanam ruchu źjaŭlajecca Centralnaja rada. Tym časam 7 traŭnia adbyvałasia pasiedžańnie Ŭstanoŭčaha schodu (jak heta patrabuje zakanadaŭstva), a nie Centralnaj rady (farmalna jašče nia stvoranaj arhanizacyi).

27 traŭnia

Śviatar na Akreścina

Noč z 27 na 28 traŭnia pastar Antoni Bokun pravioŭ u specpryjomniku‑raźmierkavalniku na Akreścina. Pryčyna zatrymańnia — praviadzieńnie relihijnaha schodu biez dazvołu ŭładaŭ. Bohasłužeńnie adbyvałasia ŭ pryvatnym domie. Pratakoł byŭ składzieny i na słužyciela carkvy Jarasłava Łukasika, hramadzianina Polščy. Padtrymać pratestanckaha pastara pryjšli kala 100 čałaviek — vierujučyja evanhielskich cerkvaŭ Miensku. Kala budynku sudu znachodzilisia žonka A.Bokuna Natalla i ich piacihadovy syn Adam.

Sudździa Centralnaha sudu Miensku Leanid Jasinovič abaviazaŭ pastara vypłacić štraf u pamiery 20 b.a. (620 tys. rub.).

29 traŭnia

Pamiežnikaŭ zacikavili papiery z Kanhresu

Studenta prahramy Kalinoŭskaha Jaŭhiena Skrabutana zatrymali na čyhunačnym vakzale ŭ Horadni — pamiežnikaŭ zacikavili papiery, jakija student, delehat Kanhresu demsiłaŭ, vioz z saboju ŭ Polšču.

SP

Клас
0
Панылы сорам
0
Ха-ха
0
Ого
0
Сумна
0
Абуральна
0