Što takoje Harvard i adkul tam biełarusy? Čamu ŭ Harvardzie studenty nie chočuć śpisvać?

Na čyje hrošy vykładčyki vodziać u restaracyi studentaŭ i jak tam žyvuć i vučacca butanskija pryncesy dy izrailskija śpiecnazaŭcy?

Čamu tak šmat znakamitaściaŭ vučyłasia mienavita ŭ Harvardzie?

Pra svaje ŭražańni ad vučoby ŭ hetym viadomym uva ŭsim śviecie ŭniviersytecie nam raspavioŭ Jarasłaŭ, naš suajčyńnik i ŭžo amal što vypusknik škoły prava Harvadskaha univiersiteta.

Rejtynhi, jakija vyznačajuć samyja lepšyja i samyja prestyžnyja univiersitety śvietu, časta davoli ŭmoŭnyja i subjektyŭnyja. Harvard tradycyjna znachoździcca na viaršyni roznych rejtynhaŭ, ale niekatoryja fakty pra najstarejšy amierykanski univiersitet ciažka pastavić pad sumniŭ. Naprykład toje, što Harvard zastajecca samym bahatym univiersitetam u śviecie — jahonaja fundacyja akumuluje kala 30 miljardaŭ dalaraŭ. Niekatoryja navat kažuć, što Harvard — druhaja pa bahaćci niedziaržaŭnaja niekamiercyjnaja arhanizacyja paśla Katalickaj carkvy. Taksama biassprečna, što Harvard maje samuju vialikuju akademičnuju biblijateku ŭ śviecie, jakaja naličvaje bolej za 15 miljonaŭ knih.

Prestyžnaść i jakaść harvardskaj adukacyi pryciahvaje ŭ Kembrydž lepšych z usiaho śvietu. Tak, mienavita ŭ Kembrydž. Ale havorka idzie nie pra anhielski, ale pra amierykanski Kembrydž, što ŭ štacie Masačusets. Heta nievialiki, ale samastojny horad, ad jakoha, sieŭšy na mietro, možna trapić u vialiki horad Bostan.

Harvardski univiersitet składajecca z kaledža, kudy iduć adrazu paśla škoły, i prafiesijnych škołaŭ, kudy iduć paśla kaledža. Samymi bahatymi i prestyžnymi prafiesijnymi škołami ličacca biznes‑škoła, jurydyčnaja škoła i miedycynskaja škoła. U hetych škołach samyja vialikija košty za vučobu (kala 50 tysiačaŭ dalaraŭ za hod), ale paśla vučoby dachody vypusknikoŭ taksama adpaviednyja.

Pieravažnuju bolšaść studentaŭ kaledža składajuć amierykancy, a voś ŭ prafiesijnych škołach značnuju dolu składajuć zamiežniki. Naprykład, biełarusy jość u biznes‑škole, na fakultecie navuki i mastactva, a taksama ŭ škole prava. Varta adznačyć, što dla surjozna žadajučych vučycca ŭ Harvardzie hałoŭnaja prablema nie hrošy, a mienavita samo pastupleńnie. Pakolki ŭniviersitet bahaty, jon moža dazvolić prymać najbolš talenavitych studentaŭ, u tym liku ź Biełarusi, prapanujučy im finansavuju dapamohu ŭ vyhladzie hrantaŭ ci pazykaŭ.

Ale kab pastupić u Harvard nie dastatkova prosta mieć dobryja adznaki i vydatna vałodać anhielskaj movaj. Vielmi važna prademanstravać dadatkovyja dasiahieńni — publikacyi, vynachodnictvy, aktyŭny ŭdzieł u palityčnym i hramadskim žyćci — voś niapoŭny pieralik takich dasiahnieńniaŭ. Šmat ludziej dasiahajuć vialikich pośpiechaŭ paśla Harvarda nie tolki tamu, što atrymali dobruju adukacyju, ale i tamu, što pierad pastupleńniem jany ŭžo mieli vidavočnyja dasiahnieńni i niezvyčajnyja bijahrafii. Dla prykładu, sioleta na mahistarskaj prahramie na fakultecie prava navučajucca takija roznyja ludzi jak były pamočnik prezidenta Irana, były izrailki śpiecnazaviec, sudździa z Kitaja i navat pryncesa Butana.

Kali paraŭnoŭvać vučoby u Harvardzie z vučobaj u BDU u vočy kidajucca try asnoŭnyja adroźnieńni: stymulavańnie kankurencyi, šmatlikija studenckija arhanizacyi i vialikaja rola samanavučańnia.

Adukacyjnaja sistema ŭ Harvardzie, jak i ŭ inšych, mienš prestyžnych amierykanskich univiersitetach, metanakiravana stymulaje kankurencyju siarod studentaŭ. Adznaki pa bolšaści kursaŭ vystaŭlajucca za ananimnyja piśmovyja ispyty (vusnyja ispyty amal nie ŭžyvajucca», bo ličacca nieabjektyŭnymi) i užyvajecca tak zvanaja «kryvaja adznakaŭ». Naprykład, vykładčyk abaviazkova pavinien pastavić 10 «piaciorak», 30 «čaćviorak» i 10 «trojek». Takim čynam, maje značeńnie nie tolki jak student napisaŭ ispyt, a toje, jak hety ispyt napisali astatnija studenty. Navat kali ŭsie napisali pryblizna adnolkava dobra, 10 čałaviek aaviazkova atrymajuć «trojki». Heta mocna ŭpłyvaje na matyvacyju studentaŭ i amal źniščaje prablemu «śpisvańnia».

Druhaja rysa adukacyi ŭ Harvardzie, jakaja kidajecca ŭ vočy, heta metanakiravanaja padtrymka studenckich inicyjatyvaŭ. Naprykład, tolki ŭ škole prava dziejničajuć kala 90 studenckich ahranizacyjaŭ — ad surjoznych časopisaŭ i palityčnych arhanizacyjaŭ da hurtkoŭ pa abaronie pravoŭ žyviołaŭ. U hetych arhanizacyjach studenty vučacca pracavać u kamandzie, raźvivajuć liderskija navyki, rastuć prafiesijna i paprostu samarealizoŭvajucca.

Treciaja rysa, jakaja mocna adroźnvaje Harvard ad bolšaści postsavieckich adukacyjnych ustanovaŭ — uzajemaadnosiny pamiž vykładčykam i studentam. Vykładčyk nie vučyć studentaŭ, a dapamahaje im vučycca samim. Bolšaja častka materyjałaŭ zasvojvajecca studentami samastojna ŭ biblijatecy, a padčas zaniatkaŭ abmiarkoŭvajucca najbolš prablemnyja pytańni. Pry hetym niama vyraznaha padziełu pamiž lekcyjami i sieminarami — zaniatki zvyčajna ŭjaŭlajuć saboj dyjałoh studentaŭ i vykładčykaŭ, hałoŭnaj metaj jakoha jość navučyć studentaŭ krytyčna dumać i samastojna prychodzić da vysnovaŭ, a nie paprostu zapaminać infarmacyju.

Asablivuju rolu Harvardski ŭniviersitet nadaje raźvićciu kantaktaŭ pamiž studentami i vykładčykami. Vykładčyki atrymoŭvajuć nievialiki biudžet na toje, kab paśla skančeńnia kursa naładzić u aŭdytoryi viečarynu, na jakoj častujuć nia tolki roznymi prysmakami, ale i vinom. Ciažka sabie takoje ŭjavić u Biełarusi, dzie heta było b kvalifikavana jak parušeńnie dyrektyvy No.1. Pry hetym u zvyčajnym bary ci kramie nikoli nie pradaduć śpirtnoje,

kali pakupnik vyhladajecie maładziej za 27 hod i nia maje aficyjnaha

dakumienta pra paŭnahadovaść. Pa vynikach łaterei studenty mohuć atrymać mahčymaść u nievialikaj kampanii pajści z vykładčykam u restaracyju, kab parazmaŭlać u niefarmalnaj abstanoŭcy (zruzumieła, za košt univiersiteta). Hetkim čynam studenty na roŭnych mohuć razmaŭlać z samimi słynnymi navukoŭcami.

Darečy, «adznaki» atrymoŭvajuć nia tolki studenty ad vykładčykaŭ, ale i vykładčyki ad studentaŭ, bo isnuje abaviazkovaja pracedura piśmovaj acenki jakaści vykładańnia kožnaha kursa. Zrazumieła, što pracedura ananimnaja, i ŭpłyvaje na karjerny rost vykładčykaŭ.

Najaŭnaść šmatlikich studenckich arhanizacyjaŭ i častyja vizity viadomych haściej paprostu pierahružajuć kalendary studentaŭ roznymi publičnymi padziejami. Štoviečar ładziacca prezientacyi, kinapakazy, publičnyja lekcyi, i na ŭsio paprostu nie chapaje času, bo ŭsio ž hałoŭnaj funkcyjaj studentaŭ źjaŭlajecca vučoba. Ale časam ciažka pazbavicca ad spakusy naviedać sustreču ŭ vuzkim kole z kamisaram Jeŭrakamisii, adrazu z dvumia prezidentami krainaŭ, ci chacia b z advakatam Chadarkoŭskaha.

Štohod na «vypuskny» Harvard zaprašaje viadomych asobaŭ u jakaści pramoŭcaŭ. Sioleta pierad vypusknikami buduć vystupać dva Biła —Bił Klintan i Bił Hejts. Darečy, zasnavalnik kampanii Majkrasoft taksama kaliści byŭ studentam Harvarda, ale kinuŭ vučobu z‑za svajho zachapleńnia kamputarami, tak i nie atrymaŭšy dyploma. Dypłom jon atrymaje sioleta, navat i nie zdaŭšy ŭsich naležnych ispytaŭ. Takim čynam, «koračka» navat z samaha prestyžnaha univiersiteta, nie źjaŭlajecca abaviazkovym składnikam karjernaha pośpiechu, ale, biassprečna, padvyšaje šancy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?