U čaćvier adbyłasia pieršaja pres‑kanferencyja z nahody praviadzieńnia ŭ kastryčniku eŭrapiejskaha maršu «Za svabodu». U arhkamitet uvajšli ŭsie subjekty Palitrady apazycyi, a taksama inšyja palityčnyja siły: Partyja BNF, AHP, ruch «Za svabodu», BSDH, BSDP, BSDP «NH», PKB, «Małady front», BCHD, «Chartyja‑97, «Volnaja moładź», Partyja prahresu i spraviadlivaści, Eŭrapiejskaja kaalicyja, pradprymalnickija arhanizacyi. Kiraŭnikom rabočaha arhkamitetu staŭ Viktar Ivaškievič (Partyja BNF).
Planujecca, što Eŭrapiejski marš projdzie ŭ druhoj pałovie kastryčnika. Dakładnaja data pakul nie nazyvajecca, ale inicyjatary najchutčej schilajucca da 21 kastryčnika (niadziela). Za mety ŭ praviadzieńni akcyi arhkamitet stavić demanstracyju eŭrapiejskaha vybaru biełaruskaha hramadztva i patrabavańnie vykanańnia ad uładaŭ 12 rekamendacyjaŭ Eŭrakamisii. Arhanizatary planujuć, što na eŭrapiejski marš źbiarecca kala 20 tysiač čałaviek.
Etapami padrychtoŭki da Eŭrapiejskaha maršu stanuć akcyi 3 i 27 lipienia. Na 27 lipienia apazycyja źbirajecca padać zajaŭku ŭ Mienharvykankam na praviadzieńnie mitynhu i kancertu na płoščy Banhałor. Što datyčyć 3 lipienia, to Viktar Ivaškievič zajaviŭ: «My budziem zaklikać našych prychilnikaŭ udzielničać u śviatkavańni 3 lipienia. Heta budzie ŭdzieł u ramkach aficyjnaha śviatkavańnia. Našy aktyvisty pryjduć na kancerty z partyjnymi i nacyjanalnymi ściahami, tam jany buduć pravodzić pracu z nasielnictvam, pierakonvać ludziej u nieabchodnaści eŭrapiejskaha vybaru Biełarusi. Praca budzie pravodzicca ŭ vyhladzie persanalnych hutarak, a taksama raspaŭsiudžvańni drukavanych materyjałaŭ».
U pačatku vosieni arhkamitet pa praviadzieńni Eŭrapiejskaha maršu planuje ŭklučyć u svoj skład ceły šerah VIP, kab ź ich dapamohaj pašyryć kolkaść udzielnikaŭ akcyi. Alaksiej Kavalec, jaki pradstaŭlaŭ na pres‑kanferencyi ruch «Za svabodu», paviedamiŭ, što Alaksandar Milinkievič zhodzien uznačalić kančatkovy arhkamitet pa praviadzieńni Eŭrapiejskaha maršu.
