1 červienia
Maładafrontaŭcaŭ nie pakidajuć
Aktyvistaŭ niezarehistravanaha «Maładoha frontu» Nastu Azarku ź Niaśvižu i Paŭła Krasoŭskaha z Žodzina vyklikali ŭ Mienskuju abłprakuraturu. Aktyvistaŭ dapytvali ŭ ramkach kryminalnaj spravy pa fakcie ŭdziełu ŭ MF niepaŭnaletniaha salihorca Ivana Šyły. U adździeł KDB u Baranavičach byŭ vyklikany Mikoła Aharodnik. Jon musiŭ dać pakazańni ŭ spravie prynaležnaści da «Maładoha frontu» aktyvista z Baranavičaŭ Jarasłava Hryščeni.
Donary strajkujuć
U Mahilovie bolš za 100 hanarovych donaraŭ pastanavili pravieści papieradžalnuju tydniovuju zabastoŭku suprać admieny lhotaŭ. Kali heta nia daść vynikaŭ, pačniecca biesterminovy strajk. Donary abiacajuć źjaŭlacca na punkty zdačy kryvi tolki ŭ vypadkach, kali kroŭ budzie treba dzieciam ci ludziam, čyjo žyćcio ŭ niebiaśpiecy. Pratest vyklikany admienaj 50% źnižak na pratezavańnie zuboŭ i leki dy 40% prybaŭki da pensii.
Trunu nasili
Na Niamizie niekalki dziasiatkaŭ navučencaŭ vynieśli symbaličnuju trunu z nadpisam «Ilhoty». Napieradzie pachavalnaje pracesii nieśli vialiki lhotny talončyk u čornaj ramcy. Milicyjantyzatrymali Paŭła Vinahradava, Paŭła Čumakova, Alaksandra Baradzienku, Vadzima Baravika, Paŭła Viltoŭskaha i Paŭła Markieviča. Try nočy jany praviali na Akreścina. Suprać Illi Šusta milicyjanty ŭžyli fizyčnuju siłu. Chłopiec ciapier znachodzicca ŭ špitali.
Sudździa Centralnaha rajonu Miensku T.Paŭlučuk na praciahu paniadziełka 4 červienia vyniesła prysud usim šaści chłopcam. P. Vinahradaŭ atrymaŭ 5 sutak aryštu, P. Markievič, P. Čumakoŭ, A. Baradzienka, P. Viltoŭski — 3. Usich ich asudzili pa art. 23.34 AK (udzieł u niesankcyjanavanaj vuličnaj akcyi). V. Baravika asudzili na 3 sutak za ŭdzieł u akcyi, a taksama dali štraf u 20 b.v (620 tysiač rubloŭ) za supraciŭ milicyjantam.
U Mahilovie padčas pikietu suprać admieny lhotaŭ zatrymali Alaksandra Anisimava dy Alaksandra Šaraburku za sprobu razharnuć bieł‑čyrvona‑bieły ściah. Materyjały administracyjnaj spravy pieradaduć u prakuraturu.
2 červienia
Raściažka i śviečki nad Horadniaj
U Horadni a 20‑j hadzinie na moście cieraź Nioman, jaki źbirajucca pašyrać, moładzievyja aktyvisty zapalili śviečki i vyviesili raściažku z nadpisam «Abarani svoj horad!» Milicyja zatrymała 5 čałaviek: Kaciu Halickuju, Źmitra Lisijenku, Illu j Ivana Šyłaŭ (14 i 16 hadoŭ), Andreja Ihnatoviča. Raściažka visieła kala 5 chvilin. Zatrymanych pratrymali ŭ pastarunku 2 hadziny, uziali tłumačeńni j adpuścili biez składańnia pratakołu.
3 červienia
Pastar Bokun
Pastar mienskaj carkvy CHVE «Jan Pradvieśnik» Antoni Bokun byŭ zatrymany padčas praviadzieńnia abradu chlebaprałamleńnia (pryčaścia) u budynku, jaki arenduje carkva na Daŭhinaŭskim trakcie ŭ Miensku. Pastara advieźli ŭ Centralny RUUS, dzie na jaho byŭ składzieny pratakoł za praviadzieńnie niesankcyjanavanaha schodu. Na nastupny dzień sud Centralnaha rajonu pakaraŭ śviatara 3 sutkami aryštu. Heta ŭžo druhoje zatrymańnie Antonija Bokuna. U minułuju niadzielu, 27 traŭnia, padčas śviatkavańnia Piacidziasiatnicy (Siomuchi) jon byŭ zatrymany na sutki j aštrafavany na 620 tysiač rubloŭ «za praviadzieńnie niesankcyjanavanaha masavaha schodu».
4 červienia
Abaroncaŭ Horadni znoŭ zatrymali
Kala dziesiaci čałaviek zatrymali haradzienskija milicyjanty kala budynku flihiela XVIII ct. Usie zatrymanyja — inšaharodnija. Siarod ich: Jarasłaŭ Hryščenia, Źmicier Lisijenka i Andruś Ihnatovič.
Maładyja ludzi ledź paśpieli padyści da flihiela, jaki ciapier raźbirajuć budaŭniki. Maładzionaŭ advieźli ŭ RUUS Leninskaha rajonu dla vyśviatleńnia asobaŭ, adkul praź niekatory čas usich adpuścili biez składańnia pratakołu.
20 tysiačaŭ podpisaŭ
Kala 20 tysiač podpisaŭ sabrana ź siaredziny sakavika pad zvarotam da kiraŭnika dziaržavy za viartańnie viernikam kompleksu budynkaŭ mienskaha klaštaru bernardyncaŭ, raźmieščanych pa vulicy Kiryła i Miafodzija, 4, 6, 8.
Zabaranili pikiet
Sustaršynia arhkamitetu partyi Biełaruskaja Chryścijanskaja Demakratyja i zajaŭnik akcyi Alaksiej Šein atrymaŭ admovu ź Mienharvykankamu na praviadzieńnie pikietu ŭ abaronu svabody sumleńnia. Akcyja mieła adbycca 8 červienia na płoščy Banhałor. Čynoŭniki nibyta mieli pytańni da dakumentaŭ, pradstaŭlenych zajaŭnikami akcyi. Heta ŭžo druhaja admova ŭładaŭ. Padobnaja akcyja mieła adbycca naprykancy krasavika na płoščy Svabody ŭ Miensku. Tady haradzkija ŭłady admovili zajaŭnikam pa toj pryčynie, što pikiet, nibyta, budzie stvarać pieraškody dla ruchu hramadzianaŭ.
5 červienia
U Vuździe
Učastkovy inspektar milicyi major Siarhiej Burło pryjšoŭ na pracu da pradprymalnika Viktara Kryvala, aktyvista Hramady, kab pravieści ź im «prafilaktyčnuju hutarku», u pryvatnaści, paznajomić z art.342 KK. Artykuł hety chitry: «Arhanizacyja hrupavych dziejańniaŭ, jakija hruba parušajuć hramadzki paradak»... A sprava ŭ tym, što 17 traŭnia na kvatery Kryvala adbyŭsia schod pradprymalnikaŭ z troch rajonaŭ vobłaści. Na hetym schodzie była zasnavana Mienskaja abłasnaja arhanizacyja prafsajuzu pradprymalnikaŭ. Voś ułady i vyrašyli papałochać.
