Aktyvistki inicyjatyŭnaj hrupy pa viartańni carkvy Śviatoha Jazepa i manastyra bernardynaŭ Ivona Macukievič i Hanna Siŭčyk sustrelisia sa staršyniom Mienharvykankamu Michaiłam Paŭłavym. Jany sprabavali daviedacca pra los śviatyni, jakuju ŭłady majuć pierabudavać pad haścinicu i zabaŭlalny kompleks. Kamentar redakcyi
Pavodle słovaŭ Ivony Macukievič, kiraŭnik stalicy paćvierdziŭ raniejšyja plany adnosna byłych klaštarnych kamianicaŭ.
Što datyčyć chramu, Paŭłaŭ adkazaŭ, što jaho pieradaduć u kamunalnuju ŭłasnaść i prystasujuć pad «abjekt kulturna-bytavoha pryznačeńnia». Razam z hetym, Paŭłaŭ zapeŭniŭ, što budynak nia budzie «źniasłaŭleny».
Padčas hutarki Paŭłaŭ spasłaŭsia na ekspertyzu budynkaŭ, praviedzienuju Ministerstvam kultury, jakaja «nia vyjaviła ŭ ich ničoha śviatoha».
«Kali my paprasili jašče raz padumać, mer skazaŭ, što «My tak vyrašyli, my — ŭłada, nam treba karmić ludziej», — kaža Ivona Macukievič.
Tym časam u abaronu carkvy j manastyra sabrali kala 20 tysiač podpisaŭ. Tolki praz katalickuju parafiju Śviatoha Jazepa prajšło 10126 podpisaŭ, adrasavanych Administracyi prezydenta.
Abarona spadčyny stała haračaj temaj za apošni hod. Pryčym iznoŭ, jak pierad padzieńniem SSSR, niezaležnaje hramadztva bjecca tut ź dziaržavaj. Horadnia, Viciebsk... Moładź, intelihiencyja, dysydenty adstojvajuć varyjanty zachavańnia staryny, «jak było». Ułady i kapitalisty chočuć pierabudoŭvać i znosić. Jak mer Paŭłaŭ i katalickija aktyvistki, pradstaŭniki ŭładaŭ i hramadzkaści hladziać na prablemu ŭ roznych optykach. «Nam treba karmić ludziej» i «nie za adnym chlebam žyvie čałaviek».
Biełaruś pierabyvaje ŭ peryjadzie absalutnaha materyjalizmu, kali spažyviectva («rost dabrabytu nasielnictva») pieratvaryłasia ŭ dziaržaŭnuju ideju, kali hrošy, prybytak staviacca pa?nad usim. A što ž inšyja kaštoŭnaści, jakija nia źmieraješ rublom, abjomam ruchavika, kvadratnym metram, ale jakija farmujuć čałavieka — asnovu taje ž ekanomiki?
Tema hetaha numaru «NN» — los architekturnaj spadčyny.
* * *
Na minułym tydni Pucin znoŭ napužaŭ. Za atrymańnie Kijevam u 90-ja hazu pa lhotnych cenach, rasiejski haz dla ŭkraincaŭ u budučyni budzie pradavacca pa cenach, daražejšych za rynkavyja na 12—17%. Adkryty šantaž. Toje samaje zaŭtra pahražaje j Biełarusi. Eŭropa dumaje, jak być. Miž tym biełaruskija dziaržaŭnyja ŚMI robiać vyhlad, što ničoha nie adbyvajecca, jak nie zaŭvažajuć jany i dyskusij vakoł Śviatoha Jazepa, i baraćby moładzi za staruju Horadniu, i prodaž «Biełtranshazu». U vyniku zakanamierna raście davier da niedziaržaŭnaj presy.
