U Pieršamajskim rajsudzie pačaŭsia razhlad hramadzianskaj spravy pavodle zajavy maci viadomaha palityka Paŭła Sieviarynca. Jana patrabuje adnaŭleńnia na pracy ŭ siaredniaj škole №40, adkul jaje zvolnili nibyta za prahuły.
Sudovuju spravu viadzie sudździa Taciana Rodzina, intaresy spadaryni Sieviaryniec pradstaŭlaje viadomy viciebski advakat Michaił Zamalin.
Padčas pasiadžeńnia Taciana Sieviaryniec padkreśliła, što ličyć svajo zvalnieńnie ŭciskam pa palityčnych pryčynach. Taksama jana zaznačyła, što kiraŭnik adździełu adukacyi Pieršamajskaha rajonu Uładzimier Šłoma nieadnarazova raiŭ joj pierastać zajmacca palitykaj i ŭpikaŭ za ŭdzieł u minułych miascovych vybarach, kali spadarynia Taciana chacieła balatavacca ŭ Viciebski harsaviet.
Naprykancy sakavika spadar Šłoma, padpisaŭšy zajavu spadaryni Sieviaryniec na adpačynak za svoj košt, praz kolki dzion admianiŭ ułasnaje rašeńnie. Takim čynam, viarnuŭšysia z adpačynku, Taciana Sieviaryniec daviedałasia, što prapuściła 6 pracoŭnych dzion biez usialakaje pryčyny. Nastaŭnicu vyšejšaj katehoryi z 35‑hadovym pracoŭnym stažam zvolnili nibyta za prahuły.
Taciana Sieviaryniec pierakananaja, što zdoleje adnavicca na pracy.
«Paśla vyvučeńnia dakumentaŭ ja peŭnaja, na 100 adsotkaŭ peŭnaja, što maja sprava vyjhryšnaja, pieramožnaja. I što ŭsio zroblenaje suprać mianie — heta čyściejšaj vady pravakacyja. Jak heta ni paradaksalna, ja raźličvaju na pieramohu!»