Maskoŭski aficyjoz maluje Pucina vialikim miratvorcam na samicie G8 u Niamieččynie. Jak ža, zrabiŭ šyroki žest u pytańni supraćrakietnaj abarony! Prapanavaŭ Bušu vykarystoŭvać dla adsočvańnia mahčymych puskaŭ iranskich rakietaŭ Habalinskuju RŁS, jakuju Rasieja aranduje ŭ Azerbajdžanie. Z Alijevym užo damoŭlena.
Uvohule heta nahadvaje stary anekdot: kupi kazu — pradaj kazu! Buš, jaki nie vyklučaŭ eskalacyi napružanaści ŭ hetym pytańni, peŭna ž, uzdychnuŭ z palohkaj. Va ŭsiakim razie, nazvaŭ prapanovu siabra Vałodzi cikavaj. Pucin pieramožna abvieściŭ: "My damovilisia z Džordžam, što našyja admysłoŭcy voźmucca za hetuju pracu jak maha chutčej…".
Kaniešnie, nazyvać kramloŭskaha haspadara vialikim miratvorcam nie vypadaje. Našto było tady pałochać Eŭropu pieranacelvańniem jadravych rakietaŭ?
"Pucin zrazumieŭ, što pierahnuŭ kij, i vyrašyŭ adhulać nazad, — padzialiŭsia sa mnoj mierkavańniem mienski analityk Andrej Fiodaraŭ. — Ale paśla papiarednich vajaŭničych zajaŭ element niedavieru i naściarožanaści z boku Zachadu budzie zastavacca".
Kaniešnie, z toj Habałoj jašče viłami pa vadzie. I Vašynhton sto razoŭ padumaje, i Maskvie moža spatrebicca novy ŭsplosk kanfrantacyi pierad vybarami, kab razahreć elektarat dy admachnucca ad zachodnich pretenzijaŭ da "suverennaje demakratyi".
I ŭsio ž faktam jość toje, što namieciŭsia varyjant kampramisu. Sa słoŭ Pucina, "heta zdymie nieabchodnaść raźmiaščać našyja ŭdarnyja kompleksy u biespasiaredniaj blizkaści ad eŭrapiejskich miežaŭ".
Inačaj kažučy, u vypadku parazumieńnia miž Maskvoj i Vašynhtonam adpaduć plany maskoŭskich stratehaŭ vykarystać Biełaruś, u pryvatnaści, raźmiaściŭšy tut aperatyŭna-taktyčnyja rakiety "Iskander". Nahadaju: biełaruskaje kiraŭnictva apošnim časam nastojliva reklamavała svaje pasłuhi dziela "adekvatnaha i asymetryčnaha adkazu" amerykancam. Peŭna ž trymajučy ŭ hałavie ekanamičnyja bonusy. Ciapier šancy na ich stanoviacca jašče bolej pryvidnymi. Bo Pucin paličyŭ za lepšaje skarystacca pasłuhami Alijeva, a nie Łukašenki. I asymetryja moža atrymacca nia ŭ toj bok.
