Eksperty fondu, što pracavali ŭ Miensku z 24 traŭnia pa 4 červienia, adnosna niabłaha aceńvajuć vyniki makraekanamičnaha raźvićcia Biełarusi na praciahu apošniaj piacihodki, paviedamlaje hazeta «Biełorusy i rynok». Z admoŭnaha jany adznačyli zamarudžanaść strukturnych reformaŭ i apiaredžvańnie rostu zarobkaŭ adnosna pradukcyjnaści pracy. Istotnaje padaražeńnie enerhanośbitaŭ na pačatku 2007 h. źmianiła sytuacyju. Prahnazujecca pamianšeńnie realnych prybytkaŭ u 2007 h. da 5,5%, a dadatkovyja straty buduć adčuvacca na praciahu bližejšych 4 hadoŭ. U cełym, adznačajuć pradstaŭniki kamisii, biełaruskija ŭłady spravilisia z sytuacyjaj i navat dasiahnuli praficytu biudžetu. Razam z tym na siońnia adznačajecca zamarudžvańnie rostu realnych zarobkaŭ da 8%, što faktyčna adpaviadaje pakazčyku pradukcyjnaści pracy. Značna pahoršyŭsia źniešniehandlovy balans.
U jakaści kampensacyjnych mierapryjemstvaŭ MVF rekamenduje admovu ad źniešnich finansavych pazykaŭ. U interviju žurnalistam kiraŭnik misii MVF Bałaž Charvat asabliva padkreśliŭ, što pytańnie ab mahčymym kredytavańni biełaruskaj ekanomiki fondam na dadzienym etapie nie razhladajecca. Zamiest hetaha biełaruskamu ŭradu prapanujecca strymlivać unutrany popyt žorstkaj makraekanamičnaj palitykaj. Na dumku specyjalistaŭ fondu nieabchodna, kab rost zarobkaŭ značna adstavaŭ ad rostu pradukcyjnaści pracy. Niepaźbiežny taksama pieranos poŭnaha koštu na enerhanośbity na spažyŭcoŭ. Adnačasova treba raspačynać strukturnyja reformy, skiravanyja na padvyšeńnie pradukcyjnaści.
Rost koštaŭ na majomaść u spravazdačy kamisii MVF tłumačycca pašyranaj ŭ apošni čas palitykaj metavaha kredytavańnia. Rost bankaŭskaha kredytu ŭ vyniku hetaha staŭ nadzvyčajnym, tamu pilny bankaŭski nahlad nabyvaje krytyčnaje značeńnie, adznačajecca ŭ štohadovaj spravazdačy.
Pa‑raniejšamu fond raić admovicca ad subsidyjavańnia ekanomiki, asabliva małaperspektyŭnych pradpryjemstvaŭ. Dasiahnieńnie praficytu mahčymaje dziakujučy ŭtrymańniu žorstkaj padatkava‑biudžetnaj palityki, bankructvu chranična stratnych pradpryjemstvaŭ, admovie ad žorstkaha administravańnia ekanomiki, reformie sacyjalnaj palityki.
