 |
Pavodle acenki načalnika słužby hidramietearałahičnych prahnozaŭ Respublikanskaha hidramieteacentra Dzmitryja RABAVA, śpioka, što ŭstalujecca ŭ Biełarusi ŭ druhoj dekadzie červienia, budzie na 4‑5 hradusaŭ vyšejšaja za klimatyčnuju normu. Kali ŭ pieršaj dekadzie miesiaca jana była na 3,1 hradusa vyšejšaja, to ŭ druhoj — čakajecca jašče bolš haračaja.
U cełym, pavodle acenki Brytanskaha i Niamieckaha hidramietearałahičnych centraŭ, heta leta abiacaje być samym haračym za stohadovy pieryjad mieteanazirańniaŭ. Siaredniaja tempieratura ŭ pieršaj dekadzie červienia skłała 18,6 hradusa ciapła. U pačatku červienia takich siarednich značeńniaŭ tempieratura dasiahaje na bolšaj častcy terytoryi respubliki prykładna raz u 7—10 hadoŭ, tolki na ŭschodzie krainy — raz u 5 hadoŭ.
Apošni raz takoje haračaje nadvorje adznačałasia ŭ 1999 hodzie, kali słupok termomietra ŭznimaŭsia vyšej za 30 hradusaŭ. Čaściej za ŭsio ŭdzień tempieratura pavietra składała da 25 hradusaŭ, u načny čas nie apuskałasia nižej za 10 hradusaŭ. Kolkaść apadkaŭ u červieni prahnazujecca nižejšaja, čym siarednija šmathadovyja, i składzie 85—90 pracentaŭ.
Nadzvyčaj haračy prahnazujecca i lipień. Jon budzie na 0,5 hradusa vyšej za klimatyčnuju normu. Pryčym na praciahu doŭhaha času buduć isci tolki karotkačasovyja łakalnyja daždžy.
Nadvorje ŭ žniŭni, pavodle papiarednich prahnozaŭ sinoptykaŭ jeŭrapiejskich krain, budzie na 1 hradus vyšejšaje za klimatyčnuju normu.
Adnak, pavodle słoŭ Dzmitryja Rabava, śpiecyjalisty Respublikanskaha hidramieteacentra mohuć dać dakładny prahnoz nadvorja na 3—7 dzion, bolš doŭhaterminovyja prahnozy na 1—3 miesiacy možna składać tolki pryblizna abo vykarystoŭvać danyja mieteastancyj inšych dziaržaŭ. Na dumku śpiecyjalista, doŭhaterminovyja prahnozy nadvorja na miesiac abo siezon źjaŭlajucca nienadziejnymi. Chaatyčny charaktar ruchaŭ u atmaśfiery vyznačaje asnoŭnuju miažu pradkazalnasci tolki na 10 dzion.
Što datyčycca prahnozaŭ u zachodniaj presie ab tym, što hetym letam u Jeŭropie čakajecca pavyšeńnie tempieratury da plus 40 hradusaŭ i vyšej, Dzmitryj Rabaŭ adznačyŭ, što taki pik tempieratur našaj krainie ŭsio ž taki nie pahražaje. U Homielskaj vobłasci z‑za zasuchi ŭžo zahinuli pasievy jaravych kultur na płoščy 6 tys.ha.
