 |
U niadzielu telekanał Eurosport pačaŭ tranślacyju finała «Roland Garros» ź vinšavańniaŭ biełarusam. Sapraŭdy takoha nichto nie čakaŭ. Biełaruskija junijory siensacyjna pieramhli ŭ troch z čatyroch naminacyj!
U adzinočnym razradzie pieramoh šasnaccacihadovy Uładzimir Ihnacik, darečy, pa papiarednim rejtynhu jon navat nie traplaŭ u 10‑ku, i byŭ tolki 12‑m. U mužčynskim parnym razradzie razam ź italjancam Tomasam Fabjano pieramoh Andrej Karatčenia. Adznačyłasia i Ksienija Mileŭskaja, jakaja ŭ pary z polkaj Uršulaj Radvańskaj taksama akazałasia na vyšejšaj prystupcy pjedestału.
Miž inšym, Ksienija Mileŭskaja siońnia u rejtynhu śvietu zajmaje treciaje miesca. Amataram futbołu vielmi dobra viadomy brat Ksienii — Arciom Mileŭski, jaki taksama dasiahnuŭ vialikich pośpiechaŭ, hulajučy za kijeŭskaje «Dynama».
«Roland Garros» 2007 hoda možna ličyć sapraŭdnym praryvam dla biełarusaŭ. Raniej siarod junijoraŭ užo «zichacieła» Viktoryja Azaranka. Ale ž taja ŭžo pierajšła ŭ «darosły» tenis. Siarod mužčyn ź biełaruskich tenisistaŭ doŭhi čas vyłučalisia tolki Mirny z Vałčkovym. Darečy, jany nie raz nahadvali, što za ichnimi plačyma niama pierajemnikaŭ. A źmiena nadyjšła. I atrymlivajecca, što zusim nie horšaja.
Jeŭraradyjo vyrašyła daviedacca pryčyny takoha niečakanaha ryŭka biełaruskich junijoraŭ. My źviarnulisia da hałoŭnaha treniera krainy Dźmitryja Tatura, jaki prysutničaŭ na «Roland Garros» i pahadziŭsia padzialicca svaimi ŭražańniami:
«Prosta trapić na hetyja korty i zhulać chocia b adzin matč — heta ŭžo vializarny pośpiech. A našaja moładź nie prosta tam zhulała adzin matč. Ale i z čatyroch naminacyj zavajavali try pieršyja miescy. Heta tryumf junijorskaha biełaruskaha tenisu. Heta raduje.
Čamu raduje? Tamu što značyć, my idziem u pravilnym kirunku. I biełaruskaja tenisnaja asacyjacyja dziakujučy dapamohi kiraŭnictva robić pravilnyja kroki dla taho, kab tenis u Biełarusi raźvivaŭsia i raźvivaŭsia paśpiachova».
Ale, jak daznałasia Jeŭraradyjo Vałodzia Ihnacik užo daŭno trenirujecca ŭ Amierycy. Darečy, amal na ŭsich spabornictvach Vałodziu supravadžaje jaho maci Śniažana, jakaja i raspaviała, što ŭžo 2 hady ŭsie treniroŭki maładoha tenisista apłočvaje amierykanskaja menedžment‑kampanija:
«Kali Vałodziu było 14 hod, jany ubačyli ŭ im pierśpiektyvu i dapamahli nam z trenirovačnym pracesam. Kaniešnie, nas heta vielmi padtrymała. Jany ličać, što jon vyraście vielmi dobrym hulcom. I jaho źniešnija dadzienyja, i ŭsio inšaje adpaviadajuć šmatlikim rekłamnym kampanijam. Im vielmi padabajecca, jak jon pavodzić siabie na korcie. Bo sport — heta ž taksama šoŭ».
Nie trenirujecca na radzimie i Andrej Karatčenia. Darečy, jamu ŭžo 18 hod, i jon pa zakonie ŭžo moža ŭdzielničać u darosłym tenisie. Čamu jon vystupaŭ za junijoraŭ, raspaviadaje jaho baćka Jury Karatčenia:
«Kali ščyra kazać, jon by ŭžo daŭno hulaŭ. Ale ž jaho traŭmy padkasili. Tamu jon źjechaŭ u Italiju. Tam jon treniravaŭsia i lačyŭsia ceły hod. Usie zaležyć ad treniera. A ŭ nas zanadta dobrych trenieraŭ niama. Jaho zadziaŭbli, zahnali. Usio na vynik: davaj‑davaj, davaj‑davaj... Jašče b krychu — i zusim by ničoha nie było».
Dyk čamu ž maładyja zorki tenisa nie mohuć treniravacca ŭ Biełarusi? Mienavita z takim pytańniem Jeŭraradyjo źviarnułasia da Śniažany Ihnacik:
«U nas cudoŭnyja junijory. Ale kab raści dalej, patrebny krychu inšyja ŭmovy, inšyja viedy trenieraŭ. Tamu daviałosia šukać mahčymaść treniravacca ŭ bolš kvalifikavanych trenieraŭ. Daviałosia źjechać u Amieryku.
Z studzienia jon pačaŭ pracavać z novym kanadskim trenieram. I voś trapiŭšy da hetaha novaha treniera, za hetyja paŭhoda, Vałodzia zrabiŭ stolki, kolki nie rabiŭ za ŭsie papiarednija hady. Ja spadziajusia, što i ŭ našaj krainie na jaho źviernuć bolš uvahi. I pačnuć dapamahać kudy bolš, čym heta było pa siońniašni dzień».
U nas, kaniešnie, tenis taksama raźvivajecca. Budujucca tenisnyja korty. Dyj i Mirny z Vałčkovym abyhrali daloka nie apošniuju rolu. Ale ž da «vialikaha» tenisu, atrymlivajecca, my jašče nie daraśli.
