Na mienskuju pivavarniu, košt jakoj aceńvajuć u $200 młn, pretenduje šerah mižnarodnych kampanijaŭ. Infarmacyja pra tender u Biełarusi nie prachodziła, pra jaho stała viadoma z rasiejskich ŚMI.
Pavodle rasiejskaj hazety «Kommiersant», na prodaž vystaŭleny chołdynh «Krynica», jaki ŭklučaje ŭ siabie brovary ŭ Miensku, Bieraści i bujniejšaha ajčynnaha vytvorcu soładu «Biełsoład». Hetuju infarmacyju paćvierdzili staršynia kancernu «Biełdziaržcharčpram» Ivan Dančanka i dyrektar «Krynicy» Ryhor Pitkievič. Chołdynh achoplivaje kala 40% piŭnoha rynku Biełarusi. Tamu nia dzivić toj fakt, što na pieršym etapie ŭ tendery prymała ŭdzieł adrazu piać mižnarodnych kampanijaŭ. U druhim etapie z kampanijaŭ SABMiller, BBH, Heineken, Sun InBev i Detroit Belarus Brewing Company zastalisia pieršyja try.
Cikavaść da biełaruskaha piŭnoha rynku nievypadkovaja. Jon aceńvajecca jak perspektyŭny. Pavodle rasiejskich ekspertaŭ, rost biełaruskaha piŭnoha rynku ŭ minułym hodzie składaŭ 28% suprać 12% rostu ŭ Rasiei. Na siońnia dva biełaruskija brovary majuć zamiežnych investaraŭ: kampanija BBH nabyła mienskuju «Alivaryju», a Detroit Investments sumiesna z IFS i A1 kantraluje babrujskuju pivavarniu «Siabar». Varta nahadać, što sproba pradać mienskuju «Krynicu» budzie druhoj pa liku. U 2000 hodzie rasiejskaja «Bałtyka», što naležyć dacka‑švedzkaj hrupie BBH, źbirałasia nabyć kantrolny pakiet akcyjaŭ brovaru za $50 młn. Biełaruskija ŭłady nieŭzabavie pieradumali pradavać «Krynicu». Pieraličany «Bałtykaj» pieršy i apošni tranš u pamiery $10,5 młn, byŭ viernuty tolki ŭ 2005 hodzie.
Charakterna, što infarmacyja pra tender u Biełarusi źjaviłasia tolki paśla taho, jak jon adbyŭsia, i ŭ rasiejskich ŚMI. Vyniki tenderu stanuć viadomyja praz paŭtara miesiaca.
