Kampanija «Jeŭrasieć» płanuje zakryćcio niekalkich mahazinaŭ u Biełarusi ŭ ramkach aptymizacyi biźniesu. Pra heta BiełaPAN paviedamiŭ hienieralny dyrektar biełaruskaha filijała kampanii Aleś Muchin.
Pavodle jaho słoŭ, častka nierentabielnych mahazinaŭ ź ciaham času budzie zakryvacca. «Heta narmalny praces, — pierakanany A.Muchin. — My pryjšli siudy rabić biźnies, i tamu ŭ tym ci inšym horadzie, rajonie, dzie my pamylilisia z pazicyjanavańniem mahazina, jany buduć zakryty — taksama, jak heta adbyvałasia i raniej».
Adkazvajučy na pytańnie, kolki mienavita sałonaŭ trapić pad skaračeńnie, A.Muchin adznačyŭ, što «hety praces žyvy». «Jašče paŭhoda tamu ja skazaŭ by, što dva. Ale ŭvod kantrolnych znakaŭ i miascovaha padatku z prodažaŭ u Minsku i Minskaj vobłaści, kaniešnie, adbiŭsia na našych prodažach — čorny rynak atrymaŭ u canie jašče bolšuju pieravahu», — skazaŭ jon.
Pry hetym A.Muchin adznačyŭ: «Budziem aptymizavać kolkaść mahazinaŭ. Ale havaryć ab masavym zakryćci nie davodzicca».
Vystupajučy na XI Pieciarburhskim ekanamičnym forumie, staršynia savieta dyrektaraŭ «Jeŭrasieci» Jaŭhien Čyčvarkin abjaviŭ, što kampanija zakryła ŭsie sałony suviazi ŭ Azierbajdžanie, chacia vyjšła na hety rynak u studzieni 2007 hoda. «Usio, što, my zrazumiejem, nie prynosić nam prybytku, my zakryjem sioleta», — skazaŭ Ja.Čyčvarkin.
U hetaj suviazi A.Muchin źviarnuŭ uvahu na toje, što «Jeŭrasieć» u Azierbajdžanie i Biełarusi znachodzicca na roznych stadyjach: «Azierbajdžan — na etapie start‑up, tam było adkryta piać mahazinaŭ, dla taho kab pahladzieć, nakolki tam u pryncypie efiektyŭnaja prapanavanaja biźnies‑madel (my pracujem lehalna na ŭsich rynkach), kab zrazumieć, nakolki my tam žyćciazdolnyja».
Rašeńnie ab zakryćci sałonaŭ u Azierbajdžanie kiraŭnik biełaruskaha filijała źviazaŭ ź vielmi nizkimi vyručkami, jakija nie apraŭdvajuć zatraty maciarynskaj kampanii navat na momant start‑up.
U Biełarusi ž u mai hetaha hoda adkryty soty sałon «Jeŭrasieci». Jak adznačyŭ A.Muchin: «My praciahvajem aktyŭna adkryvać novyja mahaziny». Pieršy sałon «Jeŭrasieci» ŭ Minsku, nahadajem, byŭ adkryty ŭ vieraśni 2005 hoda.
