"Źvierchu na jaho hladzieli vočy filina, što śviacilisia žoŭtym śviatłom u zmroku piačory.
— Heta ty, Huam?
— Nie Huam, a Huamokałatakint, — svarliva adkazaŭ filin. (…)
U Džusa milhanuła chitraja dumka. (…)
— Chočaš žyć u mianie? Ja budu karmić ciabie myšami dy piaščotnymi ptušaniatkami".
(A.Vołkaŭ. Urfin Džus dy jahonyja draŭlanyja žaŭniery".)
Juščanka napiaredadni samitu HUAM vykazaŭsia za pašyreńnie arhanizacyi, jakaja niefarmalna jość procivahaju maskoŭskamu ŭpłyvu na postsavieckim absiahu. Analityki zahavaryli, što jon maje na ŭvazie Biełaruś. Darečy, ci vypadkova dniami na samicie biaz halštukaŭ u Piciery ŭkrainski prezydent pra niešta pieramaŭlaŭsia sam-nasam ź biełaruskim kaleham?
Papiaredniaja chvala razmovaŭ pra imaviernaje ŭstupleńnie našaj krainy ŭ hety blok była spravakavanaja na pačatku hodu naftahazavaj vajnoj. Vajna skončyłasia, ale pahrozy enerhietyčnaj biaśpiecy Biełarusi nia źnikli. Stasunki miž Mienskam i Maskvoju pachmurnyja, hrafiki vyvadu koštaŭ pastavak nafty j hazu na suśvietny ŭzrovień — žaleznyja, perspektyvy zhulać na "asymetryčnym adkazie" amerykanskim supraćrakietam — pryvidnyja. Vyprošvańnie bonusaŭ u Kramla čym dalej, tym bolej vyhladaje nia tolki nieprystojnym, ale i marnym. Treba, karaciej, šukać varyjanty. Bo ŭ kanstruktara "biełaruskaha cudu", jak u toha Urfina (hł. epihraf:-), kančajecca čaroŭny parašok.
Dyk što, u HUAM?
"Heta było b fajna, — adhuknuŭsia na majo pytańnie palitolah Uładzimier Roŭda. — Zusim nia toje, što ŭsie hetyja chaŭrusy ź Iranam dy Venesuełaj… Pajšoŭ by trend u cyvilizavany bok, bo usie krainy HUAM, choć jany nadta roznyja, tak ci inačaj zaryjentavanyja na Zachad".
Ale palitolah schilajecca da dumki, što ciapierašniaja ŭłada, niahledziačy na spakusu, na taki krok nia pojdzie. "Naša aficyjnaje kiraŭnictva mo' i zhadziłasia b uvajści, vobrazna kažučy, na umovach Azerbajdžanu. Zachad, skažam ščyra, zapluščvaje vočy na niedemakratyzm tamtejšaha režymu, zvažajučy na enerhietyčnyja bahaćci. Naša ŭłada taksama chacieła b ničoha nie mianiać va ŭnutrypalityčnym žyćci".
Ale da krainy ŭ centry Eŭropy padychod kudy stražejšy. Tamu ŭłada baicca, što kali kipciurok zahruźnie — prapała ptušačka. Daviadziecca ładzić ekanamičnyja reformy, a potym pačniecca łancuhovaja reakcyja, praces pierakiniecca na palityčnuju sferu… Voś praz hetuju zaściarohu režym pierastupić nia moža, ličyć Roŭda.
Tamu badaj, maksymum, što naša kiraŭnictva moža zrabić, — heta papałochać Maskvu mahčymaściu ŭvachodžańnia ŭ HUAM. Inačaj kažučy, zajavami ŭ klasyčnym užo "styli interviju Raru".
