Na stancyi Parafjanava
 |
Kali ŭ muzyčnych daviednikach zhadvajecca pra pachodžańnie aŭtara muzyki da papularnych bradvejskich miuzykłaŭ 30‑ch, to z paznakaju: «Naradziŭsia ŭ Rasiei». Stvaralnik aŭtarytetnaha rasiejskaha internet‑prajektu «Stahodździe pierakładu» Jaŭhien Vitkoŭski nazyvaje miescam naradžeńnia Djuka horad Pskoŭ. Miž tym, kampazytar naradziŭsia na biełaruskaj ziamli, u pasiołku Parafjanava, za dva kilametry ad adnaho z samych starych miastečak Dokšyččyny, jakoje ad pačatku zvałasia Parfienava (pieršaja zhadka — 1435).
Krajaznaŭca Kastuś Šytal apaviadaje, što hetaje miastečka ŭ XIX st. było centram vołaści. U 1902 hodzie za dva kilametry ad Parfienava prajšła Bałahoje‑Siadleckaja čyhunka, u suviazi z čym tam źjaviłasia paravoznaje depo, a taksama čyhunačnaja stancyja, jakaja zajmieła nazvu «Parafjanava». Pry stancyi ŭ hety čas i ŭźnik pasiołak, dzie ŭ siamji čyhunačnaha inžynera naradziŭsia Ŭładzimier Dukielski.
«Zhadak pra jahonuju siamju amal nie zachavałasia, jość tolki nievialiki artykuł u «Pamiaci» Dokšyckaha rajonu», — kaža K.Šytal. Krajaznaŭca dadaje, što da 1939 h. u hetym pasiołku žyło šmat habrejaŭ, a siarod ich — baćka jašče adnaho viadomaha amerykanca — Sema Hejdensana, kanhresmena, jaki byŭ aŭtaram šmatlikich zakonaprajektaŭ, datyčnych Biełarusi.
Muzyka da filmu z Rejhanam
Na adnym miescy siamja Dukielskich nie siadzieła. Tolki za pieršyja 15 hod žyćcia Ŭładzimiera jany źmianili niekalki haradoŭ. Prychilnaść da surjoznaj muzyki ŭ chłopca vyjaviłasia, kali žyli ŭ Kijevie — 15‑hadovym jon pastupiŭ u kanservatoryju, ale jaho siamja iznoŭ zmušana pierajechała. Ciapier u Kanstantynopal. Tam Dukielski zajmajecca samastojna i na pačatku 20‑ch piša svaje pieršyja muzyčnyja tvory.
U 1921‑m siamja prymaje rašeńnie emihravać u ZŠA. Tam i pačałosia ŭzychodžańnie Dukielskaha, jaki z parady Džordža Heršvina ŭziaŭ «čysta amerykanski» pseŭdanim. Ciapier jon staŭ nazyvacca Vernanam Djukam.
Pad hetym imiem jon stvaraje pop‑piesieńki, jaho muzyka hučyć u bradvejskich miuzykłach «Ziegfeld Follies», «Cabin in the Sky».
U adnym ź filmaŭ, da jakoha napisaŭ muzyku Djuk, — «She Is Working Her Way Through College» («Jana choča atrymać adukacyju ŭ kaledžy») źniaŭsia Ronald Rejhan — budučy prezydent ZŠA.
Pad svaim sapraŭdnym proźviščam Dukielski pracuje ŭ surjoznaj muzycy — piša na vieršy Mandelštama, Apalinera, stvaraje Skrypičny i Vijalančelny kancerty.
Kampazytar padkreślivaŭ, što nia maje dačynieńnia da t.zv. «biełaj emihracyi» — tych, chto vyjechaŭ z Rasiei, Biełarusi, Ukrainy padčas padziejaŭ 1917—21. Jon byŭ u dobrych adnosinach ź Siarhiejem Prakofjevym, toj pakłapaciŭsia, i paśla vajny Dukielski atrymaŭ aficyjnaje zaprašeńnie viarnucca ŭ SSSR. Ale ŭzvažyŭ usio i nie pajechaŭ, u adroźnieńnie ad šmatlikich inšych emihrantaŭ. Niaciažka ŭjavić, što jaho čakała ŭ Maskvie.
Kaniec žyćcia na «Svabodzie»
U 50‑ch Dukielski adychodzić ad halivudzkich spraŭ. Pracuje na rasiejskaj słužbie radyjo «Svaboda». U archivach zachavalisia jahonyja repartažy z cyklu «Rasiejcy za miažoj» i cykl prahramaŭ pra amerykanskija muzyčnyja kamedyi.
U 60‑ch, užo chvory na rak, jon aktyŭna piša vieršy i pierakładaje antyčnych paetaŭ na rasiejskuju. Jaho serca spyniłasia padčas aperacyi na rak u kalifarnijskaj Santa‑Monicy 19 studzienia 1969 hodu.
