6 červienia
Razahnali abaroncaŭ
Kala dvuch dziasiatkaŭ viernikaŭ, pieravažna moładź, byli razahnanyja milicyjantami kala klaštaru bernardynaŭ u Miensku. A 20‑j hadzinie moładź sabrałasia na malitvu, i praź niekalki chvilinaŭ źjavilisia milicyjanty. Prysutnym nahadali, što źbiracca na sumiesnyja malitvy možna tolki z dazvołu haradzkich uładaŭ.
Teatralnaja dzieja
Inicyjatary stvareńnia partyi «Biełaruskaja chryścijanskaja demakratyja» zładzili performans pierad budynkam Kamitetu relihijaŭ i nacyjanalnaściaŭ pry Saviecie ministraŭ. Dva chłopcy, vykonvajučy rolu kataŭ, trymali za zaviazanyja ruki dziaŭčynu, apranutuju ŭ biełaje adzieńnie ź plakatam: «Ja vieru». Pierad hetaj pantamimičnaj kampazycyjaj niekalki maładzionaŭ trymali raściažku «Maju prava na vieru».
Z čyhunačnaha vakzału
Uviečary 6 červienia ź Biełarusi byŭ departavany pratestancki pastar, hramadzianin Polščy Jarasłaŭ Łukasik. Na čyhunačnym vakzale stalicy śviatara pravodzili kala 80 čałaviek, u tym liku pastary pratestanckich cerkvaŭ, vierniki i siabry Ja. Łukasika.
Mahiloŭskija donary
Mahiloŭskija donary atrymali adkaz z parlamentu na svoj zvarot z nahody skaračeńnia lhotaŭ. «Padčas padrychtoŭki dadzienaha zakonaprajektu realizavać prapanovy pa zachavańni lhotaŭ asobnym katehoryjam hramadzianaŭ kamisii nie ŭdałosia», — havorycca ŭ adkazie, jaki padpisaŭ staršynia kamisii pa pracy, sacyjalnaj abaronie, spravach veteranaŭ i invalidaŭ Siarhiej Kamianiecki.
Na sudzie nad Ščukinym
U Viciebsku ŭ časie sudu nad pravaabaroncam Valerjem Ščukinym, milicyjanty zatrymali piać čałaviek. Padtrymać Ščukina da sudu Pieršamajskaha rajonu pryjšli kala 50 čałaviek. Prykładna praz hadzinu paśla pačatku pracesu sudździa Hurjan abvieściła pierapynak. U hety samy čas adbyłasia sutyčka pamiž moładździu, jakaja pačała hukać «Hańba», i milicyjantami. U vyniku sutyčki byli zatrymanyja piaciora čałaviek — Aleś Dzieravianka, Andrej Danileŭski, Źmicier Lisijonak, Hienadź Šarach i Aleś Krutkin. Kryścinu Šacikavu, Alenu Bahdanavu i Kryścinu Michajłavu zabrała mašyna chutkaj dapamohi. U apošniaj medyki zafiksavali strasieńnie mazhoŭ.
Sproba №5
Arhanizacyja «Małady front» čarhovym razam padała dakumenty va Upraŭleńnie justycyi Mienharvykankamu dla dziaržaŭnaj rehistracyi.
Nahadajem, što minuły raz, paśla ŭstanoŭčaha schodu, jaki adbyŭsia 7 traŭnia, dziaržaŭnyja orhany admovilisia zarehistravać «Małady front».
7 červienia
Vyzvalili da sudu
Na dvuch aktyvistaŭ, Alesia Dzieravianku i Źmitra Lisijonka, što byli zatrymanyja za padtrymku Valerja Ščukina, skłali pratakoły ab niepadparadkavańni patrabavańniam supracoŭnikaŭ milicyi i ŭdziele ŭ niesankcyjanavanym masavym mierapryjemstvie. Andreja Danileŭskaha i Hienadzia Šaracha abvinavacili tolki va ŭdziele ŭ niesankcyjanavanym mierapryjemstvie. Niepaŭnaletni Aleś Krutkin byŭ vyzvaleny.
Student sudzicca
Adličany z 4‑ha kursu Akademii kiravańnia Juraś Alejnik sabraŭ pres‑kanferencyju, na jakoj paviedamiŭ pra zvarot u sud z nahody svajho adličeńnia. Baranić u sudzie chłopca budzie pravaabaronca Aleh Hułak.
8 červienia
Paŭkruhły stoł
Na kruhły stoł u Haradzienskim universytecie imia Janki Kupały, pryśviečany sprečnaj rekanstrukcyi histaryčnaj zabudovy, nie puścili miascovych krajaznaŭcaŭ — historyka Andreja Vaškieviča i žurnalista Alesia Zaleŭskaha. Universyteckaje načalstva vyklikała milicyju. Karespandentu radyjo «Svaboda» Siarhieju Astraŭcovu ŭniversyteckaja achova pieraškadžała fatahrafavać.
Ščukin zastajecca
Sud Pieršamajskaha rajonu Viciebsku pakaraŭ pravaabaroncu Valerja Ščukina štrafam na paŭtara miljona rubloŭ. Sud pryznaŭ V.Ščukina vinavatym u źniavazie členaŭ i rabotnikaŭ aparatu vybarčych kamisijaŭ padčas kampanii pa vybarach deputataŭ miascovych savietaŭ 25‑ha sklikańnia (art. 189 KK). Akramia taho, pravaabaronca pavinien vypłacić 250 tysiač kampensacyi maralnaje škody dla člena aparatu Viciebskaj abłasnoj vybarčaj kamisii Taciany Bujevič, apłacić sudovyja vydatki i štraf 170 tys. rubloŭ, nibyta nia vypłačany im jašče u 1999 hodzie za ŭdzieł u «Maršy Svabody».
Kryminalnaja sprava
U dačynieńni da mienskaha aktyvista Źmitra Lisijonka raspačata kryminalnaja sprava. Ź.Lisijonak byŭ zatrymany nočču 8 červienia kala budynku UUS Viciebskaj vobłaści (nočču na budynku źjavilisia hrafici «Svabodu Ščukinu!»). Jamu inkryminujecca art. 339 KK Biełarusi (chulihanstva).
Dačka za baćku
Rečyckaje adździaleńnie «Biełarusbanku» № 323 patajemna śpisała 539 tysiač rubloŭ z rachunku 11‑hadovaj Lidy Šabietnik. Dapamohu ad dziaržavy dziaŭčynka atrymlivała z pryčyny straty maci. Baćka 11‑hadovaj dziaŭčynki, staršynia abłasnoj arhanizacyi Sacyjał‑demakratyčnaj partyi (Hramady) Aleh Šabietnik, byŭ zavočna pakarany sudom Centralnaha rajonu Homielu štrafam na sumu 1 miljon 550 tysiač rubloŭ (720 dalaraŭ ZŠA) za pieravoz praz ukrainska‑biełaruskuju miažu materyjałaŭ ustanoŭčaj kanferencyi Sajuzu levych partyj i piaci asobnikaŭ brašury «Ab kulcie asoby Łukašenki». Pačynajučy z sakavika, sp. Šabietnik pieraličvaŭ na padadzieny sudom rachunak pa 200 tysiač rubloŭ.
10 červienia
Płener u Horadni
U Horadni prajšoŭ adnadzionny mastacki płener z udziełam biełaruskich i polskich mastakoŭ. Tvorcy zafiksavali ŭ malunkach padrychtavanyja da znosu staryja budynki.
Fińkieviča abmiežavali
Adkazny za vychad u horad major Uładzimier Michajłaŭ dazvoliŭ Arturu vyjści ŭ horad na paŭtary hadziny. 9 červienia palitviaźniu dazvolili znachodzicca pa‑za miežami kamendatury niapoŭnyja 2 hadziny. Raniej kiraŭnictva speckamendatury albo nie dazvalała chłopcu naahuł vychodzić u horad, albo dazvalała na ceły dzień. Praz abmiežavańni Artur nia maje mahčymaści naviedać łaźniu i cyrulniu, pry tym, što nieachajny vyhlad źniavolenaha moža stać padstavaj dla spahnańnia. U speckamendatury duš ramantujecca. Nahadajem, što 4 červienia Arturu Fińkieviču admovili ŭ daterminovym vyzvaleńni.
Daškieviča naviedaŭ advakat
Pa słovach Alaksandra Halijeva, Źmicier Daškievič pieraviedzieny na bolš lohkuju pracu, na zdaroŭje nia skardzicca. Nahadajem, što Źmitra Daškieviča asudzili na paŭtara hodu źniavoleńnia pavodle abvinavačańnia ŭ dziejnaści ad imia niezarehistravanaj arhanizacyi.
Pra stan zdaroŭja Klimava
Były deputat Andrej Klimaŭ užo treci tydzień znachodzicca ŭ Mienskim turemnym špitali. Tudy jaho pieraviali sa śledčaha izalataru paśla sardečnaha prystupu. Žoncy palityka Tacianie ŭdałosia pieradać mužu ŭ špital patrebnyja jamu leki.
11 červienia
Hryščeniu dapytali
U Baranavičach miascovy KDB čarhovy raz pravioŭ dopyt moładzievaha aktyvista Jarasłava Hryščeni. Jarasłavu prademanstravali kinanarezki z sudu nad aktyvistami niezarehistravanaha «Maładoha frontu» 28‑29 traŭnia, dzie jon prymaŭ aktyŭny ŭdzieł. Aktyvista pytalisia, ci vyjšaŭ jon z «MF», što rabiŭ u hetyja dni ŭ Miensku, jak apynuŭsia la sudu. Nahadajem, što ŭ dačynieńni da Ja.Hryščeni 10 traŭnia była zaviedzienaja kryminalnaja sprava pa art. 193 (dziejnaść ad imia niezarehistravanaj arhanizacyi).
