14—18 červienia ŭ stalicy projdzie 35‑j sustreča Hieneralnych sakrataroŭ kanferencyj katalickich biskupaŭ Eŭropy. Pačynajecca kanferencyja, jakaja maje nazvu «Mihracyja – heta vyklik dla Eŭropy» ŭviečary ŭ čaćvier.
Hienieralnyja sakratary 34‑ch biskupskich kanfierencyj Jeŭropy, jakija pradstaŭlajuć Ałbaniju, Bielhiju, Biełaruś, Bośniju i Hiercehavinu, Čechiju, Charvatyju, Hiermaniju, Anhliju i Uels, Irłandyju, Italiju, Litvu, Maltu, Niderłandy, Polšču, Partuhaliju, Rumyniju, Rasiju, krainy Skandynavii, Sierbiju, Šatłandyju, Słavieniju, Ispaniju, Šviejcaryju, Turcyju, Vienhryju, Ukrainu (vizantyjskaha i łacinskaha abradaŭ) sustrenucca sioleta ŭ Minsku. Na sustrečy taksama buduć prysutničać Apostalski Nuncyj u Biełarusi arcybiskup Marcin Vidavič i Hienieralny sakratar Kamisii Kanfierencyj katalickich biskupaŭ Jeŭrapiejskaj Supolnaści monsińjor Nael Treanor. Sustreča budzie praviedziena pa zaprašeńni Kanfierencyi Katalickich Biskupaŭ u Biełarusi i jaje hienieralnaha sakratara biskupa Antonija Dziamjanki, Apostalskaha Administratara Minska‑Mahiloŭskaj archidyjacezii. Aficyjnyja pradstaŭniki ŭsich biskupskich kanfierencyj Jeŭropy sustrenucca ŭ Biełarusi ŭpieršyniu.
Na sustrečy płanujecca abmierkavać stanovišča Katalickaha Kaścioła ŭ Biełarusi, prablemy mihracyi ŭ roznych jeŭrapiejskich krainach, dziejnaść Rady kanfierencyj biskupaŭ Jeŭropy i supracoŭnictva pamiž paasobnymi kanfierencyjami, pytańni ekumienizmu, a taksama temy, źviazanyja z raźviićciom pracesu jeŭrapiejskaj unifikacyi praz 50 hadoŭ paśla padpisańnia Rymskaha dahavoru.
Dni sumiesnaha prabyvańnia ŭ Minsku buduć supravadžacca supolnaj malitvaj i Eŭcharystyjaj. Sustreča raspačniecca ŭ čaćvier 14 červienia śviatočnaj Imšoju ŭ minskim archikatedralnym kaściole Imia Najśviaciejšaj Panny Maryi, u jakoj voźmuć udzieł usie katalickija biskupy Biełarusi (pačatak — a 18.30). U piatnicu ŭdzielniki sustrečy buduć celebravać śviatuju Imšu ŭ roznych parafijach Minska z udziełam viernikaŭ, a ŭ niadzielu źbiarucca na Eŭcharystyju ŭ kaściole śviatych Symona i Aleny (19.00). 17 červienia zapłanavana naviedańnie najbolš značnych miescaŭ u Minsku, a taksama vyjezd u Niaśviž, dzie ŭ prysutnaści miascovych viernikaŭ adbudziecca śviataja Imša.
U piatnicu 15 červienia Sakratary kanfierencyj katalickich biskupaŭ Jeŭropy sustrenucca ź mitrapalitam Minskim i Słuckim Fiłaretam, Patryjaršym Ekzarcham usiaje Biełarusi.
***
Zaprašajem žurnalistaŭ pryniać udzieł u pres‑kanfierencyi, jakaja adbudziecca 15 červienia 2007 h. a 12.00 u Minsku ŭ hateli «Biełaruś» (vuł. Staražoŭskaja, 15)
