Natalla Łukasik, pavodle infarmacyjnaha centra «Jevanhielskaja Biełaruś», źviarnuła ŭvahu vyšejstajačaj instancyi na toje, što rašeńnie Miadzielskaha RAŬS ad 8 traŭnia 2007 hoda ab anulacyi vida na žycharstva Jarasłava Łukasika hruntujecca na «apieratyŭnaj infarmacyi z KDB, jakaja nibyta śviedčyć, što jejny muž nanios škodu nacyjanalnaj biaśpiecy Respubliki Biełaruś». U zvarocie stavicca pytańnie, nakolki pravamierna ličyć čałavieka vinavatym u takim surjoznym złačynstvie da rašeńnia suda.
U adkazie Upraŭleńnia pa hramadzianstvu i mihracyi UUS Minabłvykankama za podpisam kiraŭnika ŭpraŭleńnia Zielankieviča havorycca, što «dazvoł na pastajannaje pražyvańnie ŭ Biełarusi anulujecca, kali jość źviestki, što inšaziemiec maje dačynieńnie da dziejnaści, skiravanaj na škodu nacyjanalnaj biaśpiecy Biełarusi», a taksama toje, što «padstavaŭ nie daviarać infarmacyi Upraŭleńnia KDB pa Minsku i Minskaj vobłaści niama». Tamu rašeńnie nakont Jarasłava Łukasika «źjaŭlajecca zakonnym, abhruntavanym i admienie nie padlahaje».
15 červienia ŭ 11.00 u Miadzielskim rajonnym sudzie adbuducca słuchańni z nahody abskardžańnia rašeńnia Miadzielskaha RAUS pra anulavańnie vida na žycharstva Jarasłava Łukasika.
Nahadajem, pratestanckaha pastara, hramadzianina Polščy Jarasłava Łukasika departavali ź Biełarusi 6 červienia.
30 traŭnia načalnik UUS Centralnaha rajona Minska Vital Siniakoŭ aštrafavaŭ Łukasika na adnu bazavuju vieličyniu (31 tys. rubloŭ) i abjaviŭ ab jaho departacyi i zabaronie na ŭjezd u Biełaruś na praciahu piaci hadoŭ. 27 traŭnia pastar byŭ zatrymany paśla nabaženstva, jakoje pravodziłasia ŭ pryvatnym domie pastara adnoj z pratestanckich cerkvaŭ stalicy.
