U presie dniami prajšła infarmacyja, što śviežaja cybula ź biełaruskich hradak na stałičnych rynkach kaštuje da 10 tysiač rubloŭ za kiłahram. Adkul biarucca takija ceny i čamu ajčynny pradukt daražejšy, čym impartnyja apielsiny, banany, kivi?
— Nasamreč nijakaha ažyjatažu vakoł śviežaj biełaruskaj cybułi ŭ nas niama, — prakamientavaŭ situacyju namiesnik načalnika ŭpraŭleńnia cenavaj pałityki Kamiteta ekanomiki Minharvykankama Mikałaj Kryževič. — Ja sam učora śpiecyjalna naviedaŭ adzin sa stałičnych mahazinaŭ. Śviežaja cybula (piaro razam z hałoŭkami) tam pradajecca pa 4190 rubloŭ za kiłahram.
Siońnia zavitaŭ na Červieński rynak. Tam u babulki lažyć svaja, z hradki cybula — tysiača za pučok. Uzvažyłi — 250 hramaŭ. Pamnožcie tysiaču na čatyry, atrymajecie tyja ž 4 tysiačy rubloŭ za kiłahram. Adkul jany ŭziałi 10 tysiač, ja nie viedaju».
Pavodle słoŭ Mikałaja Vasiljeviča, da 31 maja dziejničałi ŭstanoŭlenyja adpaviednym rašeńniem Minharvykankama hraničnyja ceny na płodaaharodninnuju pradukcyju. Ciapier jany źniaty. Adnak heta nie aznačaje, što pradaŭcy zmohuć «nakrucić» canu, jakuju zaŭhodna. Dla subjektaŭ haspadarańnia — mahazinaŭ i indyvidualnych pradprymalnikaŭ, jakija handlujuć na rynkach, — hetaja «nakrutka» na ajčynnyja charčovyja pradukty nie moža pieravyšać 25 pracentaŭ, a na zamiežnyja — 30 pracentaŭ ad koštu. Zychodziačy z kanjunktury rynku, ustanaŭłivać ceny (vyšejšyja ci nižejšyja) na svoj tavar mohuć tolki fizičnyja asoby, naprykład, taja babulka z Červieńskaha rynku, jakaja handluje cybulaj z hradki. Adnak kałi jana «załomić» canu, u jaje prosta nie kupiać «załatuju» cybulu.
Siońnia na Červieńskim rynku ajčynnyja pamidory kaštujuć kala 3800 rubloŭ za kiłahram, śviežyja ahurki — u rajonie 1500, ciapłičnyja doŭhapłodnyja i taho mienš. Biaruć ich užo nieachvotna, tamu navat u mahazinie cana na ich składaje 600—740 rubloŭ za kiłahram. Ceny na maładuju bulbu vahajucca ŭ pramiežku 1500—3000 rubloŭ, za minułahodniuju pradaŭcy prosiać 700—800 rubloŭ za kiłahram. Banany pradajucca pa 2800 rubloŭ, apielsiny 3450—3800.
Na Kamaroŭskim rynku zialonaja cybula z hałoŭkami kaštuje ad 3,5 i da 6 tysiač rubloŭ za kiłahram. Jak rastłumačyŭ našamu karespandentu načalnik słužby arhanizacyi rynačnaha handlu Mikałaj Zavalej, bolš vysokija ceny vystaŭlajuć fizičnyja asoby, jakija pradajuć svaju samastojna vyraščanuju cybulu. Rańniaja bulba kaštuje tut 1000—3000 rubloŭ za kiło, buraki — 1500—2500, banany — 2450—2700, apielsiny — 3000—4500 rubloŭ.
