Tavarazvarot miž Biełaruśsiu i Słavaččynaj letaś skłaŭ 140 młn dalaraŭ, sioleta jon pavialičyŭsia na 51%. Z Słavaččyny ŭ Biełaruś ekspartujuć mašynnyja zapčastki, ličylniki, šyny, nasosy, u advarotnym kirunku iduć naftapradukty, kalijnyja ŭhnajeńni, traktary, chaładzilniki.
Sp.Rehak ličyć, što nie naładžanyja kulturnyja adnosiny. Tak, letaś u Miensk i Bieraście pryjaždžała mastackaja vystava «Słavaččyna ŭ XVI‑XIX st.», a voś biełarusy ničoha padobnaha tak i nie zrabili. Naleta ŭ BDU planujecca adkryćcio katedry słavackaj movy. Miž inšym, ciaham pres‑kanferencyi sp. Rehak razmaŭlaŭ na vydatnaj biełaruskaj movie.
Rehak zajaviŭ, što słavackaje pasolstva budzie rabić usio mahčymaje, kab naładzić dyjaloh miž Eŭropaj i biełaruskimi ŭładami, rabić usio mahčymaje dla palapšeńnia palityčnaha klimatu ŭ krainie. Zakranuŭ jon i pytańnie pazbaŭleńnia Biełarusi handlovych preferencyjaŭ: «Kiepska, što biełaruski bok źmiryŭsia ź ich strataj. Lubyja zruchi da lepšaha ŭ pytańni abarony pravoŭ pracoŭnych, prymusiać Eŭrakamisiju pačać advarotny praces. Heta nia vyhadna nikomu. Hadzinu tamu ja razmaŭlaŭ z adnym słavackim pradprymalnikam, jaki zajmajecca biznesam u Biełarusi. Ciapier jamu davodzicca płacić pavyšanyja košty na słavackaj mytni. Handlavać ź Biełaruśsiu ciapier taksama ciažka, jak z Kitajem».
Sp.Lubamir vykazaŭ spadzieŭ, što najbližejšym časam u Biełarusi zapracuje pradstaŭnictva Eŭrakamisii. Taksama jon zakranuŭ pytańnie vizaŭ, z 1 studzienia 2008 h. Słavaččyna dałučajecca da šenhienskaj zony. Rehak skazaŭ: «Nie liču, što heta niejak nehatyŭna adabjecca na našych adnosinach. Uvohule, ja liču vizy pieražytkam minułaha i rablu ŭsio, što ad mianie zaležyć, kab źmiakčyć vizavy režym».
Darečy, 5 lipienia ŭ kaściole śviatych Symona i Aleny z nahody słavackaha nacyjanalnaha śviata — Dnia Kiryły i Miafodzija — projduć nabaženstvy pa‑słavacku i na łatyni. Udzieł u słužbach voźmie apostalski nuncyj Marcin Vidavič.