Heta budzie druhi padobny pomnik u krainie. Pieršy staić pry kaściole ŭ miastečku Mosar pad Hłybokim. Probašč vałožynskaha kaściołu Hienrych Akałatovič kaža: «Ničoha nia maju suprać mosarskaha pomnika, ale ž jon maleńki. Vy pahladzicie lepš na naš, jaho ž možna pastavić i ŭ stalicach na centralnych placach».
Ajciec Hienrych viadzie nas u kaścioł. Jan Pavał, u čałaviečy rost, jašče zakručany ŭ plonku. Pomnik čakaje pieranosu na pastament.
Pomnik byŭ vyrableny ŭ Polščy. Skulptary zrabili navat značnuju źnižku ŭ canie. Zamiest dziesiaci tysiač złotych vałožyncy zapłacili tolki siem.
Vałožynski kaścioł znachodzicca na centralnaj płoščy horadu.
Ksiondz Akałatovič pakazvaje niadaŭna zroblenyja pastamenty la kaścielnaj zvanicy i dzielicca planami na budučyniu: «Chaču tut ustalavać skulptury Matački Božaj i Jezusa. Hetaja daroha viadzie da ZAHSu, dyk kab maładyja paśla zaklučeńnia šlubu jechali ŭskładać kvietki mienavita siudy, a nie da Lenina».
Adkryćcio pomniku adbudziecca a 12:00 u subotu 7 lipienia. Maje pryjechać biskup Antoni Dziemjanka. Nakiravali zaprašeńnie i novamu staršyni mienskaha abłvykankamu Leanidu Krupcu, ale ad jaho adkazu pakul nie było.