Sud Centralnaha rajonu Miensku pakaraŭ aryštam dvuch moładzievych aktyvistaŭ Partyi BNF: Alesia Kalitu — na 15 sutak, Paŭła Sieradzienku — na 10. Partyjnych aktyvistaŭ zatrymali specnazaŭcy 3 lipienia i abvinavacili ŭ drobnym chulihanstvie.
Administracyjnyja spravy Alesia Kality i Paŭła Sieradzienki razhladała sudździa Taciana Paŭlučuk. U kabinet sudździ trapili nia ŭsie achvotnyja, jakija ad 9 ranicy čakali chłopcaŭ kala budynku sudu (heta były budynak Kołasaŭskaha liceju).
Pieršym sudzili Paŭła Sieradzienku. Jon zajaviŭ, što 3 lipienia byŭ u siadzibie Partyi BNF, kali pačuŭ z vulicy kryki Nasty Aleksandrovič ab dapamozie. Pavał apavioŭ, što pahladzieŭ u akno i ŭbačyŭ, jak nieviadomyja mužčyny ciahnuć Nastu ŭ mašynu. Pavał i Aleś Kalita pabiehli ratavać dziaŭčynu. U vyniku chłopcaŭ samich zatrymali. Ich advieźli ŭ milicyju Centralnaha rajonu. Tam na Paŭła i Alesia skłali pratakoły, abvinavaciŭšy ich u drobnym chulihanstvie. Noč chłopcy praviali ŭ turmie na vulicy Akreścina. U sud ich pryvieźli siońnia tolki ŭ 15 hadzinaŭ.
Śviedka z boku milicyi specnazaviec Hvardziejcaŭ u sudzie paviedamiŭ, što z kamitetu, jakomu jany padparadkoŭvalisia, dali kamandu zatrymlivać maładych ludziej, jakija vychodziać z upravy Partyi BNF u ichny bok. Hvardziejcaŭ kazaŭ, što specnazaŭcaŭ papiaredzili ab tym, što maładyja ludzi mohuć mieć pry sabie dyski i ahitacyjnuju litaraturu.
Sudździa Taciana Paŭlučuk pakarała Paŭła aryštam na 10 sutak. Jana patłumačyła, što da śviedčańniaŭ Nasty Aleksandrovič treba stavicca krytyčna.
Nastupnym sudzili Alesia Kalitu. Jon zajaviŭ chadajnictva, patrabujučy pierakładčyka. Na dumku naziralnikaŭ, heta razzłavała sudździu. Pierakładčyka vyklikali, ale Alesia pakarali aryštam na maksymalny termin — 15 sutak aryštu.
Aleś Kalita zajaviŭ u sudzie, što ličyć zatrymańnie preventyŭnaj mieraj i jak dokaz pryvioŭ pakazańni specnazaŭca.
Chłopcaŭ advodzili ŭ milicejski «varanok» pad vopleski prysutnych. Siabry niezarehistravanaj arhanizacyi «Małady front» vykazali svaju salidarnaść z moładzievymi aktyvistami Partyi BNF. Jany paviedamili «Svabodzie», što buduć ładzić pikiety kala budynku turmy na vulicy Akreścina.
 Pavał Sieradzienka — pad milicejskim kanvojem |
 Nasta Aleksandrovič — čakajučy rašeńnia ŭ sudzie |
 Aleś Kalita — paśla pakarańnia aryštam |
