Tradycyjna napačatku miesiaca prapanujem vašaj uvazie dziasiatku najbolš cikavych, na naš pohlad, muzyčnych navinak. Vielmi pryjemna, što znoŭ nie abyšłosia bieź biełaruskich hurtoŭ.
Seeed — Bam Bam
Seeed — adzin z najbolš viadomych i pavažanych muzyčnych kalektyvaŭ Hiermanii.
Styl hurta vyznačyć adnaznačna składana — heta niešta pamiž rehi, chip-chopam i dabam. Admietnaść Seeed u tym, što ŭ skład kalektyvu ŭvachodzić adrazu 11 čałaviek: 2 salisty, dy-džej i vialikaja instrumientalnaja kamanda.
Bam Bam — šosty albom u dyskahrafii hurta, jaki prychilniki čakali doŭhija siem hod.
Nick Cave & The Bad Seeds — Ghosteen
Dvajny albom Ghosteen zakryvaje svojeasablivuju muzyčnuju «tryłohiju», raspačatuju dvuma papiarednimi albomami hurta, Push the Sky Away i Skeleton Tree.
Hałoŭnymi liryčnymi temami alboma, pa słovach Kiejva, źjaŭlajucca «kachańnie, pačućcio straty i zdolnaść adpuskać».
Varta nahadać, što padčas zapisu papiaredniaha alboma zahinuŭ 15-hadovy syn Nika Kejva. U Ghosteen Kiejv šukaje i, zdajecca, znachodzić u sabie žadańnie i siły niejak ruchacca kudyści dalej.
Portico Quartet — Memory Streams
Portico Quartet — heta čaćviora brytanskich muzykaŭ, jakija ŭ svajoj tvorčaści spałučajuć džaz z elektronnaj muzykaj.
Atrymlivajecca z hetaha vielmi smačny i pryhožy kaktejl, a novy albom krytyki ličać najlepšym za apošnija 10 hadoŭ.
Relikt — Dreva žyćcia
Z vychadam novaha alboma hurt Relikt pravioŭ nievialički rebrendynh: dla spraščeńnia pošuku i ŭsprymańnia ŭ naźvie adzinka pamianiałasia na litaru «L».
Ale na hetym sa źmienami skončana. U muzyčnym płanie heta ŭsio tyja ž narodnyja pieśni, vykananyja ŭ firmovym paznavalnym «reliktavym» styli. Što vielmi dobra.
Mando Diao — BANG
Šviedski hurt za 20 hadoŭ svajho isnavańnia, zdajecca, da daskanałaści davioŭ svoj huk i styl. Jany — paznavalnyja, i heta ich jak plus, tak i minus.
Tyja, chto čakaŭ niečaha novaha, kažuć pra toje, što albom davoli siarednieńki. Amataraŭ ža stylu BANG zadavoliŭ, ale ŭsie schodziacca na dumcy, što heta daloka nie najlepšaja rabota ŭ dyskahrafii šviedaŭ.
FOALS — Everything Not Saved Will Be Lost: Part 2
U sakaviku pieršaja častka alboma brytanskaha hurta FOALS ustalavała nadzvyčajna vysokuju muzyčnuju płanku. I druhaja častka, vidavočna, nie rasčaravała prychilnikaŭ — heta zajaŭki na zvańnie najlepšych albomaŭ u svaim muzyčnym žanry.
Kali pieršaja častka była bolš mieładyčnaj i ńju-vejvavaj, to druhuju FOALS imknulisia zrabić bolš rokavaj i ekśpierymientalnaj.
Shuma — Me, Mother
U svaim novym albomie Shuma sabrała staražytnyja biełaruskija pieśni, jakija vykarystoŭvalisia žančynami ŭ roznych rytuałach, i zachavała ŭsie moŭnyja dyjalekty.
«Me, Mother» — hukavaja misteryja, pryśviečanaja kalektyvam našaj Maci Ziamli, a taksama svaim baćkam i dzieciam.
Stereophonics — Kind
Svoj adzinaccaty albom valijcy zapisali ŭ brovary Ramsbury Brewery & Distillery ŭ anhlijskim horadzie Marłbara, hrafstva Uiłtšyr, usiaho za 11 letnich dzion.
Cigarettes After Sex — Cry
Frantmen hurta Hreh Hansales raniej pryznaŭsia, što bačyć druhi albom hurta jak film, — a krytyki adznačajuć kiniematahrafičnaść i adnačasova miedytatyŭnaść płytki.
Kanye West — Jesus Is King
Niekali Kańje chacieŭ kinuć čytać rep, bo heta — muzyka djabła. Ale pastar zmoh pierakanać repiera i nakiravać tvorčaść u stanoŭčuju płyń. Rašeńnie znajšłosia ŭ vyhladzie alboma na relihijnuju tematyku.
Sioleta Kańje Uest zasnavaŭ hospeł-hurt, jaki vykonvaje pa niadzielach relihijnyja pieśni i kaviery na staryja treki Uesta. Tam ža ŭpieršyniu byŭ vykanany adzin z trekaŭ alboma.
Na Kalady Uest abiacaje jašče adzin relihijny albom.
Našy papiarednija ahlady:
