U Biełarusi nie apasajucca bajkotu čempijanatu śvietu pa chakiei, jaki ŭ mai 2014 hoda projdzie ŭ Minsku. Ab hetym zajaviŭ ministr zamiežnych spraŭ Biełarusi Uładzimir Makiej u intervju infarmacyjnamu ahienctvu BNS.
Uładzimir Makiej raskazaŭ, što, zychodziačy z ahulnapryniataha mižnarodnaha etykietu, byli nakiravany zaprašeńni kiroŭnym asobam susiednich ź Biełaruśsiu krain, a taksama dziaržaŭ, jakija buduć udzielničać u čempijanacie
[u ČS udzielničajuć ZŠA, Rasija, Finlandyja, Hiermanija, Šviejcaryja, Łatvija, Kazachstan (buduć hulać u hrupie V razam ź Biełaruśsiu); Čechija, Šviecyja, Kanada, Italija, Francyja, Narviehija, Danija, Słavakija — hrupa A — zaŭv. NN].
«My vielmi dobra razumiejem situacyju, jakaja źviazana, jak ja skazaŭ, z demanizacyjaj Biełarusi ŭ jeŭrapiejskaj hramadskaj dumcy i, moža być, u amierykanskaj hramadskaj dumcy.
Ale tym nie mienš my svoj abaviazak vykanali, a ŭžo sprava adpaviednych kirujučych asob - pryniać ci nie pryniać udzieł. My nie razhladajem heta jak niejki bajkot ź ich boku», - adznačyŭ ministr. Jon nahadaŭ, što na peŭnym etapie z boku roznych arhanizacyj była sproba arhanizavać bajkot ČS. «Ale, jak bačycie, čempijanat adbudziecca. Ja liču, što heta absurdna niedarečnaja ideja. Sport pavinien być pa-za palitykaj. I hety čempijanat zadumvaŭsia nie dziela imidžu prezidenta Łukašenki», - skazaŭ kiraŭnik MZS Biełarusi.
«My chacieli dastavić zadavalnieńnie 10 młn zaŭziataraŭ u našaj krainie i vialikaj kolkaści zaŭziataraŭ, u tym liku ź Litvy i Łatvii, inšych krain, jakija zareziervavali ŭžo sabie miesca dla naviedvańnia hetaha čempijanatu. Tamu my nie apasajemsia bajkotu, my spakojna hladzim na hetu situacyju, rychtujemsia da čempijanatu. Budzie zabiaśpiečana maksimalnaja zručnaść dla hledačoŭ», - adznačyŭ Uładzimir Makiej, dadaŭšy, što pytańni padrychtoŭki čempijanatu rehularna abmiarkoŭvajucca ŭ arhkamitecie.
Pavodle słoŭ ministra, u vip-łožy «Minsk-Areny» bolšaść miesc užo zabraniravana. «My viedajem, što časam rašeńni prymajucca i ŭ samy apošni čas, da čempijanatu jašče daloka. Tamu my spakojna hladzim na hetu situacyju. Jość užo šerah lidaraŭ, jakija zajavili, što pryjeduć, bolš taho, adbuducca dziaržaŭnyja i aficyjnyja vizity, prymierkavanyja da hetaha čempijanatu», - skazaŭ kiraŭnik biełaruskaha MZS.
