Biełaruski futbalist Michaił Makoŭski, što ŭ svoj čas hulaŭ va Ukrainie, prakamientavaŭ By.tribuna.com padziei apošnich miesiacaŭ u Kijevie. Pryvodzim niekatoryja vytrymki ź intervju:
by.tribuna.com
— Vy stali vidavočcam padziej u Kijevie…
- Tak. Pryjechaŭ va Ukrainu šukać pracu.
— Vy byli na Majdanie?
— Byŭ adzin razočak. Chacieŭ pahladzieć, što adbyvajecca. Praŭda, znachodziŭsia nie na Majdanie, a na vulicy Hrušeŭskaha. Byŭ tam u toj dzień, kali palili pomnik Łabanoŭskamu. Pahladzieŭ. Žachnuŭsia. Kali spalili pomnik, ja adrazu ž pajšoŭ adtul. Prosta šok! Jak tak možna rabić ź lehiendaj futboła?
(…)
Chacia, ščyra, ja nie pavažaju Majdan. Ja liču hetych ludziej fašystami i banderaŭcami. Ich učynki — sapraŭdnaje biaźmiežža! Zaraz va Ukrainie chaos!
— Chaos — heta kali ludzi stralajuć adzin u adnaho?
— Heta ŭsio «Pravy siektar». Vykažu svajo mierkavańnie. Apazicyja byccam by choča zrabić niešta, ale damahajecca hetaha niapravilnym šlacham. Bo ŭzbrojeny zachop ułady — heta sapraŭdny fašyzm. Usio treba vyrašać mirnym šlacham. Pa-mojmu, zaraz kraina padzielicca na dźvie častki. Budzie Uschodniaja i Zachodniaja Ukraina. Usio! Voś Jacaniuk, Turčynaŭ … Što jany robiać?
- Što jany robiać?
- Zabaranili rasijskuju movu. Nikudy jany nie vyvieduć Ukrainu. Tut Pucin - usio!
Pra «Bierkut»
Kolki zahinuła bajcoŭ «Bierkuta»? Ja pavažaju hetych chłopcaŭ. Jany abaraniajuć ŭładu Ukrainy. Hetyja ludzi abaraniali dziaržavu, vykonvali zahad. . A Janukovič … Źjechaŭ u Rastoŭ, daŭ pres-kanfierencyju. Ja jaje pahladzieŭ. Niepierakanaŭča. U traŭni buduć vybary prezidenta Ukrainy. Ščyra kažučy, nie baču, chto im moža stać. Cimašenka? Kličko? Chto?
— Davajcie padumajem.
— Što tut dumać.
Kali b Łukašenka pryjšoŭ va Ŭkrainie da ŭłady, ŭsio ŭ ich u krainie było narmalna.
(…)
— Zaraz Kijeŭ razburany?
- Nie. Usio ŭ paradku. Usio pryhoža. Praŭda, ekanomika krainy imkliva padaje. Ciapier usia palityčnaja aktyŭnaść pierabrałasia z Kijeva ŭ Krym. Tam rasijanie. Ja — za Rasiju!
— Ci padtrymlivajecie ŭvod rasijskich vojskaŭ u Krym?
- Viadoma. Kali rasijskija ściahi ŭ Kierčy, Simfieropali, Sievastopali, jak inakš?
Rasijskija vojski vykonvajuć miratvorčuju funkcyju. Zaraz u Krymie spakojna.
Michaił Makoŭski naradziŭsia ŭ 1977 h. u Maładziečnie. Vystupaŭ za «Elektramodul», «Maładziečna», «Dynama» Minsk, u 1997 h. pierajechaŭ u «Dynama» Kijeŭ, ale za dva hady zhulaŭ tolki dva matčy, hulaŭ za «Dynama-2» Kijeŭ (35 matčaŭ), «Dynama-3», paśla padarožža pa šerahu kłubaŭ zdoleŭ bolš-mienš zamacavacca ŭ «Zakarpaćci», za jakoje zhulaŭ 49 matčaŭ (2001—2002, 2007). Skančvaŭ karjeru ŭ kłubach druhoj i pieršaj biełaruskich lihaŭ «Haradziei» i «Smarhoni».
