Siońnia Alaksandr Łukašenka adpraviŭ u adstaŭku staršyniu Mahiloŭskaha abłvykankama Piatra Rudnika. Pryčyny adstaŭki nie nazyvajucca.
Navučaŭsia za miažoj
Piatro Rudnik naradziŭsia ŭ Brahinski rajonie na Homielščynie, ale źviazaŭ svoj los z Mahilovam. Varta adznačyć najbolš intryhoŭny momant ź bijahrafii čynoŭnika — vučobau ŭ HDR. U 1985 hodzie Piatro Rudnik skončyŭ Drezdenski techničny ŭniviersitet.
Trapić u toj čas na navučańnie za miažu było zusim niaprosta. Čałaviek pavinien byŭ być absalutna dobranadziejnym i addanym.
Ź biełaruskich top-čynoŭnikaŭ niejkuju adukacyju za miažoj jašče atrymlivaŭ ministr zamiežnych spravaŭ Uładzimir Makiej, jakija navučaŭsia ŭ Dypłamatyčnaj akademii Aŭstryi.
A pamočnik prezidenta pa ekanomicy Kirył Rudy byŭ stypiendyjatam prahramy Fułbrajta, i stažyravaŭsia va ŭniviersitecie Čykaha (ZŠA).
Hanarovy lifcior
Vialiki pieryjad žyćcia Rudnika byŭ pryśviečany pracy na «Mahiloŭliftmašy». U 1995-m jon staŭ namieśnikam dyrektara zavoda, praź piać hadoŭ pierajšoŭ na pasadu kamiercyjnaha dyrektara, a ŭ 2003-m uznačaliŭ pradpryjemstva.
«U toj čas u Rasii byli pryniatyja novyja praviły ekspłuatacyi liftaŭ. Nivodzin lift, jaki vypuskaŭsia na postsavieckaj prastory, nie padychodziŭ pad praviły dla zamiežnaj pradukcyi. Voś tady kiraŭnictvam «Mahiloŭliftmaša» i było pryniataje rašeńnie stvarać novy madelny šerah. Pa inicyjatyvie Rudnika hetuju zadumku pačali ažyćciaŭlać u 2005-m. Unifikavali šerah detalaŭ i vuzłoŭ, ukaranili linija dla vyrabu modulaŭ, jakaja aŭtamatyčna nastrojvajecca na patrebny pamier», — raskazvajecca ŭ knizie, pryśviečanaj jubileju pradpryjemstva.
Pad kiraŭnictvam Rudnika kolkaść vyrablenych liftaŭ vyrasła z 3100 da 8800 za hod.
Adnojčy vykazaŭsia ŭ padtrymku biełaruskaj movy
U kancy 2009 hoda kiraŭnik Mahiloŭskaj vobłaści Piatro Rudnik zaćvierdziŭ kompleksny płan pa papularyzacyi biełaruskaj movy ŭ vobłaści. Kažuć, što heta adbyłosia paśla taho, jak «hubiernatar» naviedaŭ dni Mahiloŭščyny ŭ Maskvie.
Najpierš zajaŭlali pra biełarusizacyju abłasnych rajonak. I, sapraŭdy, jany admovilisia ad dapatopnych savieckich nazvaŭ na karyść pryhožych biełaruskich, ale movy bolej u ich nie stała.
Dziela spraviadlivaści varta adznačyć, što pry Rudniku ŭ vobłaści była zarehistravanaja adna niezaležnaja hramadska-palityčnaja hazieta — «Uzhorak» (Horki). U inšych abłaściach u hety čas miascovyja čynoŭniki i takoha sabie nie dazvalali.
Druhim punktam išło stvareńnie biełaruskich kłasach u škołach, padtrymka biełaruskamoŭnaj adukacyi. Ale heta ŭvohule skončyłasia poŭnym pšykam! Na 370-tysiačny horad jość usiaho adna dziaŭčynka Jalinka Sałaŭjova, jakaja navučajecca pa-biełarusku.
Karaciej, vynikaŭ nijakich nie było.
Samaja stratnaja vobłaść
Na terytoryi Mahiloŭščyny niama nivodnaha pramysłovaha hihanta, tamu jana robić najmienšy ŭniosak u ahulny VUP.
Naprykład, za studzień-listapad 2014-ha dola Mahiloŭščyny skłała ŭsiaho 7,2%, i, u adroźnieńnie ad inšych rehijonaŭ, jaje VUP jašče i padaje.
Letaś heta była adzinaja vobłaść, ułasnyja dachody jakoj mienšyja za datacyi z respublikanskaha biudžetu.
Alaksandr Łukašenka trymaje vobłaść na asablivym kantroli, bo heta jahonaja radzima.
Prychilnik zbroi
«Siońnia ŭ našym hramadstvie čałaviek z tabielnaj zbrojaj ŭsprymajecca nie jak faktar niebiaśpieki, a jak čałaviek, jaki nadzieleny uładaj i jaki zaklikany abaraniać hramadstva ad usiakaj zarazy, jakaja moža ŭźniknuć. Heta siońnia nadaje hramadstvu stabilnaść», — heta ci nie samaja viadomaja i rezanansnaja fraza kiraŭnika Mahiloŭskaj vobłaści.
Zusim niadaŭna, 6 listapada, naviedvajučy Mahiloŭščynu, Łukašenka raskrytykavaŭ pracu miascovaha čynavienstva. Jon daŭ poŭny kart-błanš Piatru Rudniku pa zvalnieńniach. Łukašenka amal zahadnym tonam paviedamiŭ: «U vas čas da 15 listapada zamianić usich, chto znachodzicca nižej za vas, pačynajučy ad pieršaha namieśnika, i da pradpryjemstvaŭ, kałhasaŭ. Vy prymicie rašeńni i dašlecie mnie list kaho vyzvalili, kaho pryznačyli. Styl pracy, vy sami paćvierdzili, nikčemny».
Voś i hadaj, ci to Rudnik tak nikoha i nie zvolniŭ z «nikčemnaściaŭ», ci to sam trapiŭ u inšy śpis.
