Fota: xseanathonx via reddit
Pa źviestkach biełaruskaha Tavarystva ratavańnia na vadzie, jašče da pačatku kalandarnaha leta ŭ Biełarusi zahinuli ad utapleńnia 87 čałaviek, ź ich 5 byli niepaŭnahadovymi. Jašče 58 čałaviek byli ŭratavanyja, taksama było praduchilena bolš za 5 tysiač niebiaśpiečnych situacyj.
Utapleńnie vyhladaje nie tak, jak ujaŭlajuć sabie mnohija. Chutčej čałaviek nie budzie kryčać i bułtychacca, a budzie padobny da papłaŭka.
Chacia mohuć zdaracca prystupy paniki, jakija časta pakazvajuć u kino, u ludziej, jakija tonuć, dziejničajuć zusim inšyja refleksy.
Kali čałaviek tonie:
- Jon praktyčna nie zdolny kryčać — dychańnie dla arhanizmu bolš pryjarytetnaja funkcyja. Rot čałavieka budzie to padymacca nad vadoj, to apuskacca pad vadu. Kali čałaviek vynyrvaje, jon ledź paśpiavaje ŭdychnuć-vydychnuć, času na kryki nie chapaje.
- Jon chutčej stanie adkidać hałavu nazad i trymać rot raskrytym. Vočy buduć ci zapluščanyja, ci raspluščanyja, ale z pustym, niesfakusavanym pozirkam. Viadoma, u jaho nie budzie času prybrać vałasy z tvaru, jany mohuć zachilać vočy i zaminać dychać.
- Jon nie zdolny machać rukami — refleksy prymušajuć sprabavać adšturchnucca ad vady, vyciahnuŭšy ruki ŭ boki pad pavierchniaj. Hetyja nie nadta efiektyŭnyja ruchi dazvalajuć pieryjadyčna padymacca nad vadoj albo trymać nad pavierchniaj vady tolki rot.
- Jon zastajecca ŭ viertykalnym stanie i nie sprabuje padtrymać cieła nad vadoj nahami. Hetaja instynktyŭnaja reakcyja, ź jakoj ciažka zmahacca, ale jakaja nie daje padpłyć da rataŭnika ci navat pieraviarnucca na śpinu. Čałaviek budzie «płyć na miescy».
Kali bačycie čałavieka ŭ padobnym stanie, prosta spytajcie, ci ŭsio dobra. Kali čałaviek niešta adkaža (navat hruba), to ŭsio narmalna. A voś kali nie zdolny adkazać, patrebnaja dapamoha.
Praŭda, dapamahać čałavieku, jaki tonie, treba aściarožna — jakim by dobrym ni byŭ čałaviek, u nadzvyčajnaj situacyi jon moža patapić i siabie, i ratavalnika.
Fota: kenschroeder.net
Kab uratavać čałavieka na vadzie:
- Kličcie dapamohu, kali sami płavajecie nie nadta dobra. Šukajcie pobač ratavalnaje koła ci inšyja srodki. Kidajciesia ratavać «hołymi rukami», tolki kali niama lepšych opcyj.
- Padpłyvajcie da čałavieka chutka, ale raźličvajcie siły. Ich spatrebicca jašče voj jak niamała.
- Padpłyvajcie lepiej zzadu, kab čałaviek nie ŭchapiŭ vas za ruki ci hałavu. Kali vas uchapili, tut ža vyryvajciesia.
- Kab vyzvalić svaju ruku, rezka paviarnicie jaje suprać vialikaha palca ruki, jakoj vas uchapili, i rvanicie ruku na siabie. Kali schapili dvuma rukami, prasuńcie volnuju ruku pad adnu z ruk čałavieka, uchapiciesia za druhuju, šturchajcie pieršuju navierch.
- Kali vyzvalicca ciažka, nyrajcie — instynkt samazachavańnia spracuje, čałaviek maje vas adpuścić.
- U lubym vypadku namahajciesia padšturchnuć čałavieka ŭvierch. Najlepiej heta atrymajecca, kali sa śpiny abchapić čałavieka za pojas, pahruziŭšysia pad vadu i «vyskačyŭšy» razam ź im.
- Kali vyšturchnuli čałavieka, paviarnicie jaho da siabie śpinaj, uchapicie palcami padbarodździe, vypramcie ruki, pakładziciesia na śpinu, płyvicie brasam. Jak varyjant, paviarnicie čałavieka krychu na bok, vaźmicie čałavieka pad vierchniuju ruku, płyvicie na boku z dapamohaj noh i volnaj ruki.
Kali vy nie paśpieli padpłyści da čałavieka, pakul jon trymaŭsia na vadzie, heta jašče nie kaniec.
Navat kali čałaviek apuściŭsia pad vadu i prabyŭ tam niekalki chvilin, nie hublajcie nadziei znajści jaho. Viarnuć da žyćcia čałavieka možna jašče paśla prykładna 6 chvilin pad vadoj.
Fota: city.kyotango.lg.jp
Kali čałaviek straciŭ prytomnaść i nie dychaje:
- Jašče ŭ vadzie pasprabujcie zrabić štučnaje dychańnie sa rta ŭ rot.
- Na bierazie pakładzicie čałavieka žyvatom na svaju sahnutuju ŭ kalenie nahu, ačyścicie rot ad piasku i iłu.
- Kab ačyścić lohkija ad vady, naciśnicie rukoj na śpinu miž łapatak albo raskryjcie rukoj rot i naciśnicie na korań jazyka.
- Kali čałaviek nie pačaŭ dychać, pakładzicie jaho na śpinu i zrabicie štučnaje dychańnie rot u rot: adkińcie hałavu čałavieka krychu nazad, hłyboka ŭdychnicie, ščylna pryciśnicie rot da rota i vydychnicie. Dajcie zrabić vydych samastojna.
- Kali i pulsu niama, adnačasova sa štučnym dychańniem treba rabić niepramy masaž serca. Na adzin udych rabicie 4-5 šturškoŭ rukami na hrudzinu (adna ruka pierpiendykularna hrudzinie ŭ nižniaj jaje treci, druhaja pavierch paralelna hrudzinie, šturški čaściej za raz na siekundu), paśla šturškoŭ nie adryvajcie ruki.
- Kali zdajecca, što nie atrymlivajecca ŭratavać, nie zdavajciesia, šancy jość jašče 15, a to i 30 chvilin.
- Navat kali ŭratavany čałaviek dobra siabie adčuvaje, treba źviarnucca da daktaroŭ — moža zdarycca aciok lohkich.
Darečy, dzieci lubiać kupacca hučna. Kali dzicio šumieła ŭ vadzie, ale raptam zmoŭkła, jość pryčyna naściarožycca.
Jašče raz, ścisła. Kali čałaviek padobny da nieprytomnaha papłaŭka, kličcie dapamohu. Kali pryjdziecca rabić usio samomu, šukajcie pobač ratavalnaje koła. Kali niama, padpłyvajcie sa śpiny, nie davajcie siabie schapić, vyšturchvajcie na pavierchniu, kładzicie na śpinu, płyvicie da bieraha. Kali čałaviek nie dychaje i niama pulsu — štučnaje dychańnie rot u rot i niepramy masaž serca.
Sumniajeciesia, što ŭsio zrazumieli pravilna? Pašukajcie videa na Youtube, raspytajcie znajomych. Tolki za apošni tydzień u Biełarusi na vadzie zahinuli dziesiaciora.
