Aktyvistku Ninu Bahinskuju sudovyja vykanaŭcy prymušajuć vyzvalić sadovy domik ŭ kaapieratyvie «Hieołah-SM» (vioska Damašany), jaki byŭ u mai aryštavany za-za niaspłaty štrafaŭ, nakładzienych pastanovami sudoŭ.
Pryčym termin, da jakoha Bahinskaja abaviazanaja vyzvalić aryštavanaje raniej lecišča ad asabistych rečaŭ, zaviaršajecca 29 lipienia. Mienavita list takoha źmiestu «Ab vyzvaleńni pamiaškańnia» atrymała niadaŭna Nina Bahinskaja z adździeła prymusovaha vykanańnia Smalavickaha rajona.
U ramkach vykanańnia pastanovy ab ździajśnieńni asobnaha vytvorčaha dziejańnia adździeła prymusovaha vykanańnia Pieršamajskaha rajona Minska jašče ŭ mai z kvatery aktyvistki ŭ Minsku sudovyja vykanaŭcy kanfiskavali mikrachvaloŭku i pralnuju mašynu ŭ lik štrafaŭ za akcyi, a taksama nakłali aryšt na dačnyja ŭčastki. I voś čarha dajšła da kanfiskacyi pieršaha ź ich.
Damok užo paśpieli acanić u KUP «Minski abłasny centr inviestycyj i pryvatyzacyi» na sumu 10 000 rubloŭ (sto miljonaŭ da denaminacyi). Hetyja hrošy, paśla prodažu «z małatka» lecišča, dziaržava puścić na pahašeńnia štrafaŭ, jakich u Bahinskaj na siońniašni sabrałasia amal 75 miljonaŭ rubloŭ. A što dalej, niaŭžo čarha dojdzie i da apošniaha dačnaha ŭčastka? I heta pry tym, što častka piensii aktyvistki štomiesiac taksama idzie na pahašeńnie sudovych štrafaŭ.
Na svaje pratesty ŭ prakuratury i zajavy ŭ sudy Bahinskaja atrymlivaje farmalnyja adpiski, adnak praciahvaje adstojvać svaje parušanyja pravy. Nina Bahinskaja pryncypova admaŭlajecca spłočvać štrafy pa pastanovach sudoŭ za ŭdzieł u roznych akcyjach i pikietach, pakolki ličyć, što štučnyja zabarony ŭładaŭ na praviadzieńnie masavych mierapryjemstvaŭ – antykanstytucyjnyja pa sutnaści i parušajuć jaje prava na mirnyja schody.
Nina Bahinskaja — udzielnica mnohich vuličnych akcyj, na jakich jana niaźmienna prysutničaje ź bieł-čyrvona-biełym nacyjanalnym ściaham.
