Sud ES pryniaŭ papiaredniaje rašeńnie ab prypynieńni vysiečki dreŭ u Biełaviežskaj puščy. Pra heta Polskamu radyjo paviedamili polskija dypłamaty ŭ Luksiemburhu.
Pres-sakratar urada Polščy Rafał Bachenek zajaviŭ, što pakul nie bačyŭ pryniataha Jeŭrapiejskim sudom dakumienta, adnak, jak tolki heta adbudziecca, reakcyja polskaha boku nie prymusić siabie čakać.
Rafał Bachenek taksama nahadaŭ, što kroki, pryniatyja polskim uradam adnosna Biełaviežskaj puščy, całkam adpaviadajuć zakonu.
«Miery, jakija byli pryniatyja nami ŭ Biełaviežskaj puščy, całkam adpaviadajuć nie tolki polskamu, ale i jeŭrapiejskamu zakanadaŭstvu. Kali Sud Jeŭrapiejskaha sajuza, tym nie mienš, pradstavić padobnaje rašeńnie, na što ŭ jaho jość poŭnaje prava, my, paśla taho, jak aznajomimsia ź jaho arhumientami, pradstavim svaju pazicyju ŭ dadzienym pytańni», — adznačyŭ jon.
Nahadajem, 13 lipienia Jeŭrapiejskaja kamisija padała pazoŭ suprać Polščy ŭ Sud Jeŭrapiejskaha Sajuza ŭ suviazi z vysiečkaj lesu ŭ Biełaviežskaj puščy. Jeŭrakamisija taksama prasiła Sud ES zapatrabavać ad Polščy nieadkładnaha spynieńnia vysiečki dreŭ da zaviaršeńnia razhladu spravy.
Jeŭrapiejskija ŭłady ličać, što dziejańni Polščy supiarečać zakonam ab zachavańni pryrody i pahražajuć biaśpiecy abjekta, zaniesienaha ŭ Śpis suśvietnaj spadčyny JUNIESKA.
Skandał vakoł vysiečki Biełaviežskaj puščy praciahvajecca ŭ Polščy ŭžo niekalki miesiacaŭ: ułady śćviardžajuć, što dazvolili śpiłoŭvać tolki suchastoj i zaražanyja žukom-karajedam drevy. Ekołahi pratestujuć i patrabujuć dać reliktavamu lesu samastojna spravicca z naturalnymi pracesami abnaŭleńnia masiva. Jak paviedamlała Dziaržaŭnaje laśnictva Polščy, z 2012 hoda, kali było zaŭvažanaje masavaje źjaŭleńnie ŭ Biełaviežskaj puščy žuka-karajeda, było vysiečana kala 157 tys. zaražanych dreŭ. Z pačatku biahučaha hoda lesaruby likvidavali bolš za 2,8 tys. dreŭ.
