Pavieł Duraŭ. Skryn videa: TuckerCarlson / YouTube
Paśla siami hadoŭ maŭčańnia zasnavalnik «UKantakcie» i Telegram Pavieł Duraŭ daŭ intervju amierykanskamu žurnalistu, byłomu viadučamu Fox News Takieru Karłsanu. Što ŭ im cikavaha?
Pra dziacinstva
Pavieł Duraŭ naradziŭsia ŭ 1984 hodzie. Kali jamu było 4 hady, jaho siamja pierajechała ŭ horad Turyn u Italii. Tam jon pajšoŭ u škołu i staŭ, pa jaho słovach, jeŭrapiejcam. Jak śćviardžaje Pavieł, u Italii jany z bratam cudoŭna pravodzili čas.
«Brata pakazvali ŭ pramym efiry pa italjanskim telebačańni jak vunderkinda, jaki moh rašać kubičnyja ŭraŭnieńni ŭ režymie realnaha času va ŭzroście 10 hadoŭ», — raskazvaje Duraŭ.
Pa słovach mužčyny, kali jon pajšoŭ u škołu ŭ Italii, to navat nie viedaŭ, jak havaryć pa-italjansku.
«Ja nie viedaŭ nivodnaha słova. I bolšaść nastaŭnikaŭ havaryła, što hety chłopiec nie dasiahnie pośpiechu ŭ našaj škole. A ŭ kancy druhoha hoda ja byŭ najlepšym vučniam u kłasie», — zhadvaje Duraŭ.
Paśla raspadu Savieckaha Sajuza siamja viarnułasia ŭ Rasiju. Baćka Durava, jaki viadomy jak daśledčyk antyčnaj litaratury, staŭ dekanam Sankt-Pieciarburhskaha dziaržaŭnaha ŭniviersiteta.
U Rasii, pa słovach Paŭła, jon vučyŭsia ŭ ekśpierymientalnaj škole, u jakoj «paralelna vučyli šeść zamiežnych movaŭ, i była matematyka, jakaja była ŭ škołach z pahłyblenym vyvučeńniem matematyki, taksama jak i chimija».
Duraŭ zhadvaje, što jaho brat «stanaviŭsia pieramožcam mižnarodnych alimpijad pa matematycy i prahramavańni. I rabiŭ heta šmat razoŭ zapar». Pra siabie asabista Pavieł havoryć, što byŭ «tolki samym lepšym vučniem škoły».
Ź Italii siamja pryviezła kampjutar IBM. «My byli adnoj ź niamnohich siemjaŭ u Rasii, jakija sapraŭdy mahli navučacca prahramavańniu», — adznačaje Duraŭ.
Pra majomaść
Pavieł adznačaje, što ŭ jaho žyćci «ŭsio nikoli nie zvodziłasia da hrošaj», i śćviardžaje, što ŭ jaho na rachunku «niekalki sotniaŭ miljonaŭ dalaraŭ i bitkojny». Apošnimi jon vałodaje 10 hadoŭ i ničoha ź imi nie robić.
«U mianie niama nijakaj nieruchomaści, samalotaŭ ci jacht. Hety ład žyćcia nie dla mianie. Moj hałoŭny pryjarytet u žyćci — maja svaboda. Jak tolki pačnieš skuplać rečy, heta pryviaža ciabie da fizičnaha miesca.
Mnie padabajecca być sfakusiravanym na tym, što ja rablu. Kali ja kuplu dom ci, skažam, samalot, to ja budu vymušany tracić na heta čas i namahańni. Ja by lepš pryniaŭ rašeńnie, jakoje paŭpłyvała b na toje, jak ludzi buduć kamunikavać pamiž saboju, čym vybrać koler kresła ŭ maim domie, jakija ŭbačać tolki ja i maje rodnyja, nu, moža, jašče siabry», — havoryć Duraŭ.
Pra svaju pazicyju ŭ kampanii
Pavieł Duraŭ vałodaje Telegram na 100 pracentaŭ. Heta jon tłumačyć imknieńniem da niezaležnaści:
«Pryčyna taho, što ja imknuŭsia trymacca dalej ad vienčurnaha kapitału (pa mienšaj miery na pačatku našaha raźvićcia) u tym, što my chacieli być niezaležnymi. My viedali, što naša misija i našy mety nie abaviazkova buduć supadać z metami fondaŭ, jakija mahli b inviestavać u nas».
Pavieł zhadvaje, što ŭ jaho kampanii byli prajekty, nakiravanyja na pryciahnieńnie źniešniaha finansavańnia, ale «kali sprava dachodzić da kapitału kampanii, my nikomu nie dali ni prava ŭłasnaści, ni kantrolu hałasavańnia».
Pavieł śćviardžaje, što da hetaj pary źjaŭlajecca adzinym prodakt-mieniedžaram u svajoj kampanii.
«Ja da hetaj pary prydumvaju bolšaść funkcyj, praciahvaju pracavać napramuju z kožnym inžynieram, z kožnym dyzajnieram, chto ŭplataje niejkija novyja funkcyi. Ja kiruju hetaj kampanijaj, tamu što mnie heta padabajecca. Ja — adziny prodakt-mieniedžar, tamu što heta adzinaja mahčymaść unieści svaju leptu».
Pa słovach Durava, u jaho kampanii niama adździełu kadraŭ. Jak tłumačyć Pavieł, jany zapuścili płatformu Comtest, dzie pieryjadyčna pravodziać konkursy dla inžynieraŭ. U vyniku pieramožca moža dałučycca da kamandy, jakaja, pa słovach Durava, składajecca tolki z 30 inžynieraŭ.
«Jana sapraŭdy vielmi maleńkaja i supierefiektyŭnaja. Jaje možna paraŭnać z kamandaj marskich kocikaŭ. …. Ja dumaju, my robim cudoŭnuju rabotu. U Telegram amal 900 miljonaŭ aktyŭnych karystalnikaŭ i, ja dumaju, praz hod my piarojdziem rubiež u 1 miljard».
Čytajcie taksama:
Rasijski błohier pradaŭ juziernejm @pavel za $80 tysiač. Pakupnik padaryŭ jaho Paŭłu Duravu
Duraŭ abvierhnuŭ suviaź Telegram z rasijskimi ŭładami
Pavieł Duraŭ daŭ intervju Takieru Karłsanu
Pavieł Duraŭ paabiacaŭ novuju funkcyju ŭ telehramie śpiecyjalna dla našaha rehijona
