На вугальнай шахце ў заходняй частцы Турцыі адбыўся выбух, у выніку чаго загінуў прынамсі 201 чалавек. Сотні шахцёраў па-ранейшаму знаходзяцца пад заваламі.
Трагедыя адбылася на шахце ля горада Сома ў правінцыі Маніса, прыкладна за 250 км на поўдзень ад Стамбула.
Як заявіў мэр горада Маніса Джэнгіз Эргюн, высветленая на дадзены момант колькасць ахвяр можа быць не поўнай.
Мяркуецца, што ў момант выбуху пад зямлёй на глыбіні каля двух кіламетраў знаходзіліся 580 шахцёраў. Не выключана, што многім з іх удалося выратавацца.
Па словах міністра энергетыкі Турцыі Танера Йылдыза, прычынай выбуху стала кароткае замыканне.
Як заявіў міністр у інтэрв'ю турэцкаму тэлебачанню, ахвяры трагедыі загінулі з-за атручвання чадам.
Турэцкія тэлеканалы дэманструюць кадры, на якіх ратавальнікі дапамагаюць гарнякам падняцца з шахты на паверхню.
Некаторыя з іх могуць ісці самастойна, аднак большасць дастаўляюць на насілках да карэтаў хуткай дапамогі.
Тым часам канцылярыя Рэджэпа Таіпа Эрдагана абвясціла, што прэм'ер-міністр у сувязі з выбухам на шахце адмяніў запланаваны візіт у Албанію — замест гэтага Эрдаган накіруецца да месца трагедыі ў Сому.
