Прэм'ер-міністр Грэцыі Алексіс Цыпрас і кіраўнік Еўрапейскай камісіі Жан-Клод Юнкер ў Брусэлі, 3 чэрвеня 2015 года Фота AFP
Кіраўнік Еўрапейскай камісіі Жан-Клод Юнкер ў суботу адмовіўся праводзіць тэлефонную гутарку з прэм'ер-міністрам Грэцыі Алексісам Цыпрасам.
«Грэчаскі прэм'ер-міністр папрасіў аб тэлефоннай размове ў 9 гадзін раніцы, але Юнкер адмовіў у гэтым, адзначыўшы адсутнасць абяцанага прагрэсу ў дыскусіях і прапановах з боку Грэцыі», — цытуе агенцтва Франс Прэс прадстаўніка Еўракамісіі.
«Новага развіцця няма, абмяркоўваць няма чаго», — дадаў ён.
Яшчэ ў пятніцу Цыпрас ў парламенце заяўляў, што Грэцыя ні ў якім разе не прыме прапановы крэдытораў, якія патрабуюць працягу палітыкі жорсткай эканоміі і вядуць да спаду эканомікі. Ён казаў, што яго непрыемна здзівілі прапановы Юнкера, які патрабуе працягваць ранейшую палітыку.
