Варшаўскі смеццеперапрацоўчы завод дапамог жыхару прыгарада польскай сталіцы адшукаць 96 тыс. злотых (каля 22 тыс. еўра), якія ён памылкова выкінуў у смецце. Сродкі прызначаліся на лячэнне яго дачкі.
«Мы разглядаем гэта як калядны цуд», — адзначыў прадстаўнік кампаніі па вывазе і ўтылізацыі смецця Караль Войцік.
Паводле яго слоў, яшчэ б крыху і грошы перамалоліся б і былі б перапрацаваныя на паліва.
«Яшчэ б 10 секунд, калі б стужка не спынілася ў пэўны момант, пакет з грашыма разам з астатнім смеццем адправіўся ў спецыяльны адсек», — сказаў Караль Войцік.
На шчасце, аднаму з працаўнікоў завода ўдалося адшукаць згубу.
Уладальнік грошай прапаноўваў яму ўзнагароджанне, але той адмовіўся.
0
0
0
0
0
0