Reuters.com
Спіс краін, грамадзянам якіх забаронены ўезд у ЗША, будзе дапоўнены: да дзяржаў, якія ўжо знаходзяцца ў спісе, дададуць Паўночную Карэю, Венесуэлу і Чад, піша Бі-бі-сі.
Як растлумачылі ў Белым доме, такое рашэнне было прынята па выніках перагляду палітыкі інфармацыйнага супрацоўніцтва — а менавіта інфармацыі, якую падаюць іншыя краіны амерыканскім спецслужбам.
Новыя абмежаванні ўступяць у сілу з 18 кастрычніка.
«Бяспека Амерыкі — мой галоўны прыярытэт, — заявіў прэзідэнт Дональд Трамп. — Мы не дапусцім у нашу краіну тых, каго мы не можам падвергнуць пільнай праверцы на прадмет бяспекі».
Уезд у ЗША будзе таксама па-ранейшаму забаронены грамадзянам Ірана, Емена, Лівіі, Сірыі і Самалі.
Судан з гэтага спісу будзе выключаны — такім чынам, агулам абмежаванні будуць тычыцца васьмі дзяржаў.