23-гадовы жыхар Гродна заўважыў на пероне мясцовага чыгуначнага вакзала сімпатычную дзяўчыну і вырашыў пазнаёміцца. Але лепш прайшоў бы міма.
19-гадовая дзяўчына праводзіла сваю сяброўку. Калі дзяўчына засталася адна, хлопец вырашыў падысці. Аднак гутарка не зладзілася, далей дзеянне перамясцілася ў сквер прывакзальнай плошчы. Грамадзянка па-ранейшаму не адказвала на знакі ўвагі, а юнак не пакідаў яе ў спакоі, хоць яна не раз пра гэта прасіла, паведамляе гродзенская міліцыя.
Тады хлопец спачатку пасыпаў галаву дзяўчыны попелам ад цыгарэты, далей паліў грамадзянку вадой, потым даў аплявуху і напрыканцы схапіў за грудзі. Пацярпелая патэлефанавала свайму хлопцу ў Масты, адкуль і сама родам, той, у сваю чаргу, паведаміў аб тым, што адбываецца, у міліцыю.
Міліцыянты затрымалі хлопца. На дзіва, ён быў цвярозым. Супрацоўнікам міліцыі малады чалавек, які афіцыйна нідзе не працуе, назваўся акцёрам. У выніку за свой «спектакль» гродзенец можа правесці пару гадоў за кратамі — на «акцёра» завялі справу за хуліганства.
