Галоўнае ўпраўленне па расследаванні злачынстваў у сферы арганізаванай злачыннасці і карупцыі Следчага камітэта завяршыла расследаванне крымінальнай справы ў дачыненні да былога старшыні Жодзінскага гарвыканкама, 57-гадовага Юрыя Шарага, паведамляе прэс-служба СК.
Юрыя Шарага затрымалі ў лістападзе 2018-га.
Яго вінавацяць у здзяйсненні злачынстваў супраць інтарэсаў службы, у тым ліку «звязаных з забеспячэннем беспадстаўнага пералічэння грашовых сродкаў у асабліва буйным памеры прадпрымальнікам, з якімі падтрымліваў сяброўскія адносіны».
Акрамя таго, былы мэр Жодзіна абвінавачваецца ў атрыманні хабараў, за якія ён нібыта «спрыяльна вырашаў пытанні ў інтарэсах прыватных арганізацый-забудоўшчыкаў аб будаўніцтве шматкватэрных жылых дамоў у Жодзіне» і ўвядзенні тых дамоў у эксплуатацыю.
З кіраўнікамі некаторых суб'ектаў гаспадарання, адзначаюць следчыя, мэр меў адносіны выяўна неслужбовага характару.
Старшыня Жодзінскага гарвыканкама быў затрыманы супрацоўнікамі ГУБАЗіК МУС і УУС Мінаблвыканкама непасрэдна пасля атрымання хабару. Разам з ім затрымалі дзвюх асоб, што перадавалі хабар.
