Вазы на пр. Незалежнасці перафарбуюць гэтай вясной, як толькі ўсталюецца спрыяльнае надвор'е. Пра гэта «Мінск-навінам» распавяла начальнік упраўлення па ахове гісторыка-культурнай спадчыны Міністэрства культуры Беларусі Наталля Хвір.
Вазы перафарбавалі ў жоўты колер у 2018 годзе. У некаторых гараджан такое рашэнне выклікала пратэст. Але гэты колер для гэтых элементаў архітэктуры выбралі не ўпершыню.
— Вазы з'яўляюцца неад'емнай часткай гісторыка-культурнай каштоўнасці ў забудове цэнтральнай частцы пр. Незалежнасці. На гэты аб'ект распаўсюджваюцца патрабаванні заканадаўства аб культуры, — распавяла Хвір.
Гэтай вясной вазы набудуць новую афарбоўку. Спецыялісты ўжо правялі фізіка-хімічнае абследаванне, у адпаведнасці з якім абралі хімічны склад фарбы і яе адценне — PALAZZO 180. Колер блізкі да слановай косці. Рашэнне ўзгоднена з Міністэрствам культуры.
