У Беларусі распрацоўваюцца кропкавыя меры падтрымкі суб'ектаў гаспадарання і людзей, якія апынуліся ў складанай эканамічнай сітуацыі з-за каранавіруса. Пра гэта паведаміў БелТА старшыня Пастаяннай камісіі Палаты прадстаўнікоў па эканамічнай палітыцы Леанід Брыч.
Комплекс эканамічнай падтрымкі будзе рэалізаваны ў некалькі этапаў. Вядзецца падрыхтоўка адпаведнага ўказа. У прыватнасці, разглядаюцца магчымасці пераносу тэрмінаў выплаты падаткаў, прадастаўлення права мясцовым саветам уводзіць паніжальныя каэфіцыенты па маёмасных падатках, правядзення падатковых канікул для ІП і самазанятых. Яшчэ адной дзейснай мерай можа стаць павелічэнне тэрмінаў замежнагандлёвых аперацый да 280 каляндарных дзён.
«Мы прапануем прыпыніць выплаты сум асноўнага доўгу і працэнтаў па крэдытах, даць малому і сярэдняму бізнесу канікулы на выплату камунальных паслуг. Яшчэ адзін з варыянтаў падтрымкі — прапанаваць пацярпелым з-за пандэміі акцыянерным таварыствам правесці дадатковую эмісію прывілеяваных акцый з наступным набыццём іх дзяржавай з безумоўным правам выкупу ў поўным аб'ёме, калі сітуацыя нармалізуецца», — адзначыў Леанід Брыч.
Таксама прадугледжваецца спрашчэнне парадку і ўмоў дзяржаўнай сацыяльнай дапамогі сем'ям, якія ў цяперашніх умовах страцілі прыбытак. Сярод прэферэнцый можна назваць і вызваленне ад пені (да шасці месяцаў) у выпадку несвоечасовай аплаты камунальных паслуг.
Звернулі ўвагу распрацоўшчыкі плана і на магчымасці забеспячэння аддаленай працы прадпрыемстваў і дыстанцыйнага навучання школьнікаў і студэнтаў.
