Фота: Serhii Nuzhnenko / AP
Кіраўнік украінскай разведкі заявіў, што расійскія акупанты не мелі ніякага іншага плана захопу Кіева, акрамя «ўдалай» высадкі дэсанту ў Гастомелі (аэрапорт за 30 кіламетраў на паўночны захад ад Кіева, непадалёк ад беларускай мяжы — НН). Пра гэта кіраўнік Галоўнага ўпраўлення разведкі Мінабароны Украіны Кірыл Буданаў заявіў у інтэрв'ю Дзмітрыю Камарову, піша «Украінская праўда».
«Увесь план быў — гэта імклівая высадка пасадачным спосабам [на аэрадром Гастомель] і адтуль ісці. Гэта быў наогул адзіны план… Па-першае, яны не верылі, што тут будзе супраціў наогул, па-другое, яны верылі, што імпэтна высадзяцца, і самалёт за самалётам будуць выгружаць падраздзяленні, якія адразу будуць уваходзіць у Кіеў».
Буданаў дадаў, што цэлы дзень 24 лютага 2022 года расіяне спрабавалі высадзіць там дэсант, і свята верылі, што ім гэта ўдасца.
Паводле яго, не апошнюю ролю ў гэтым адыграла тая інфармацыя, якую распаўсюджвала ўкраінская разведка.
«Тая, у якую яны хацелі верыць, яна ўсё ж узяла верх. Чаму казалі, што расіяне тупыя, не верылі, што ўсё ж будзе вайна: яны не ўзялі з сабой палівазапраўшчыкаў, у іх танкі спыняліся, не было падвозу харчоў, гэта ўсё праўда. (…) Ніхто не спадзяваўся ваяваць, як у Марыупалі. Варыянтаў такіх не было. Яны верылі, што ніхто не зможа стварыць ім сур'ёзнае процідзеянне, і яны зойдуць ва ўрадавы квартал, зменяць кіраўніцтва. Так як, на іх думку, кіраўніцтва дзяржавы на гэты час павінна было б кудысьці бегчы, калі не — яны яго знішчылі б», — сказаў Кірыл Буданаў.
Кіраўнік ГУР дадаў, што Расія цягам двух тыдняў мяняла дату ўварвання. Канчатковую інфармацыю аб нападзе а 4-й раніцы 24 лютага Украіна атрымала прыкладна ў 15:00 23 лютага.
У той жа час, ён лічыць, што калі б Расіі ўдалося высадзіцца ў Гастомелі, то «Кіеў быў бы ўзяты».
Са слоў Буданава, актыўна Расія пачала рыхтавацца да агрэсіі супраць Украіны з 2007 года, а ў 2014 годзе акупанты скарысталіся зручным для іх момантам.
Пры гэтым ён лічыць, што вайна паміж Украінай і Расіяй была непазбежнай.
Ён заявіў, што РФ хацела пачаць поўнамаштабнае ўварванне яшчэ ў сакавіку 2021 года, але гэтыя планы былі выкрытыя.
Чытайце таксама:
Адгарадзіцца ад РФ 100-кіламетровай зонай бяспекі: галоўны разведчык Украіны назваў адну з мэт вайны
Залужны пра перамогу Украіны: Замала толькі вызвалення акупаваных тэрыторый
Залужны згадаў, што давяло яго да слёз з пачатку расійскага ўварвання
