Палітзняволеныя беларускія журналісткі Tut.by Марына Золатава і Людміла Чэкіна, адлюстраваныя на постары арганізацыі «Рэпарцёры без межаў». Фота: RSF
Міжнародная арганізацыя «Рэпарцёры без межаў» (RSF) далучылася да акцыі салідарнасці з беларускімі палітвязнямі-журналістамі ў 12-ці краінах свету. Пра гэта 31 ліпеня арганізацыя паведаміла на сваім афіцыйным сайце.
Акцыя ўяўляла сабой размяшчэнне партрэтаў дзясяткаў затрыманых рэжымам Лукашэнкі журналістаў каля офісаў арганізацыі. Як адзначае RSF, выказванне салідарнасці прымеркавана да разгляду Вярхоўным судом Беларусі апеляцыі фігурантаў па «справе Tut.by» Людмілы Чэкінай і Марыны Золатавай.
У акцыі паўдзельнічалі штаб-кватэра RSF у Парыжы, а таксама офісы ў Берліне, Бруселі, Жэневе, Лондане, Стакгольме, Вене, Вашынгтоне, Тунісе, Дакары, Тайбэі і Рыа-дэ-Жанейра.
«Журналістыка — гэта не злачынства, злачынствам ёсць пераслед журналістаў. Махавік рэпрэсій у дачыненні да незалежных медыя Беларусі нават праз тры гады пасля падзей 2020 года толькі набірае абароты, а журналістаў асуджаюць на жахлівыя тэрміны. RSF падтрымлівае нашых партнёраў з Беларускай асацыяцыі журналістаў і заклікае да неадкладнага вызвалення дзясяткаў журналістаў у Беларусі», — заявіла арганізацыя «Рэпарцёры без межаў».
Нагадаем, што ў гэты момант у беларускіх турмах знаходзіцца 36 супрацоўнікаў медыя, арыштаваных за выкананне сваіх прафесійных абавязкаў, а таксама за нязгоду са сфальсіфікаванымі прэзідэнцкімі выбарамі, гвалтам і рэпрэсіямі ў краіне.
У іх лік уваходзяць і рэдактары «Нашай Нівы» Ягор Марціновіч і Андрэй Скурко, якія ўтрымліваюцца за кратамі з 8 ліпеня 2021 года.
Чытайце таксама:
Марафон «Нам не ўсё адно!» фінішаваў, канчатковая сабраная сума — 574 356 еўра
Беларускі дызайнер стварыў тэлеграм-напамін пра палітвязняў у краіне
Акцыю салідарнасці са зняволеныміжурналістамі «Нашай Нівы» зладзілі на парусніку ў Балтыйскім моры
