20 верасня проста на платформе чыгуначнага вакзала ў Віцебску адбылося забойства.
Аб бойцы на платформе міліцыі паведамілі прыкладна а палове на восьмую. Супрацоўнік, які прыбыў на месца, выявіў толькі пацярпелага без прытомнасці, выклікаў дзяжурнага медыка і падмацаванне. Пасажыры паведамілі, што мужчыну збіў малады хлопец, які з'ехаў таксоўкай.
Пацярпеламу пачалі аказваць дапамогу дзяжурны медык з вакзала і добраахвотнікі-медыкі з ліку пасажыраў.
Міліцыянты з асабістых мабільных тэлефонаў беспаспяхова набіралі 103 - на іншым канцы сувязь ці то абрывалася, ці то ўваходныя званкі скідалі.Усё ж з некалькіх спробаў удалося выклікаць «хуткую дапамогу».
Зрэнкі мужчыны перасталі рэагаваць на святло, пульс і дыханне зрабіліся малапрыкметнымі, а «хуткай» усё не было. Тыя, хто аказваў пацярпеламу першую медыцынскую дапамогу, яшчэ некалькі разоў тэлефанавалі на 103 і нават прапаноўвалі данесці мужчыну да станцыі хуткай дапамогі, але іх запэўнівалі, што машына ўжо пад'язджае. Нажаль, да вакзала яна прыбыла толькі ў 20.05, і тое не з таго боку. У 20.10 медыкі канстатавалі смерць.
Па неафіцыйнай інфармацыі, атрыманай ад супрацоўнікаў вакзала,
канфлікт паміж забітым мужчынам і маладым хлопцам адбыўся з-за 100 расійскіх рублёў. Забойца нанёс ўсяго адзін удар у галаву, пастаяў над чалавекам, які ўпаў, а потым пайшоў «лавіць» таксоўку,на якой і з'ехаў з вакзалу.
Адзін з чытачоў «Народных навінаў Віцебску» даслаў фота, зробленыя на месцы здарэння мабільным тэлефонам.
