Прэзідэнт Венесуэлы Уга Чавес адрэагаваў на вылучэнне адзінага кандыдата ад апазіцыі Энрыке Капрылеса абразай на яго адрас, назваўшы палітыка «подлай свіннёй».
«Цяпер у нас ёсць няўдачнік, сардэчна запрашаем. Мы збіраемся сцерці цябе ў парашок на выбарах 7 кастрычніка», - заявіў Чавес, звярнуўшыся да кандыдата ад кааліцыі, выступаючы перад аўдыторыяй, што ўключала ў тым ліку сябра Чавеса галівудскага акцёра Шона Пена.
«У цябе ёсць свінячы хвост, свіныя вушы, ты рохкаеш, як свіння, ты подлая свіння. Ты свіння, не спрабуй схаваць гэта», - дадаў прэзідэнт Венесуэлы.Усё гэта адбывалася на цырымоніі ўручэння дыпломаў студэнтам-медыкам у правінцыі Варгас.
Прыхільнікі Чавеса ужо раней звярталі ўвагу на яўрэйскія карані Капрылеса і пагрозу «сіянізму», пры гэтым распаўсюджвалі карыкатуру, якая паказвае яго са свастыкай.
Галоўнае абвінавачванне супраць апазіцыянера заключаецца ў тым, што ён марыянетка ЗША.
У выхадныя жыхары Венесуэлы маглі прыняць удзел у усеагульных выбарах кандыдата ад апазіцыі. У выніку праціўнікам Чавеса стаў губернатар штата Міранда Энрыке Капрылес.
