Беларускі парламент у першым чытанні разглядае праект закона «Аб медыяцыі». Пра гэта паведаміў старшыня Вышэйшага гаспадарчага суда Віктар Камянкоў 19 чэрвеня ў Мінску на нарадзе, прысвечанай завяршэнню пілотнага праекта па развіцці медыяцыі ў краіне.
Як растлумачыў Камянкоў, медыяцыя — адна з альтэрнатыўных форм вырашэння спрэчак, якая ўяўляе сабою канфідэнцыяльны перамоўны працэс з удзелам нейтральнай асобы — медыятара, які садзейнічае бакам у прыняцці ўзаемавыгаднага рашэння для ўрэгулявання канфлікту.
Пасля прыняцця закона аб медыяцыі запланавана распрацоўка крытэрыяў адбору і парадку прыцягнення гаспадарчымі судамі ў прымірэнчай працэдуры іншых асоб у якасці медыятараў.
Камянкоў паведаміў, што падчас рэалізацыі пілотнага праекта па развіцці медыяцыі было праведзена анкетаванне ўдзельнікаў працэсу. Пры гэтым 95% апытаных спадабалася медыяцыя, і ў выпадку неабходнасці яны зноў гатовы звярнуцца да яе.
Пазасудовыя медыятары атрымалі практычны вопыт. «Прававы эксперымент дазволіў атрымаць практычныя звесткі аб прымяненні інстытута медыяцыі ў камерцыйных і іншых спрэчках з мэтай падрыхтоўкі праекта закона «Аб медыяцыі», — адзначыў кіраўнік ВГС.
Ён сказаў, што на падставе заканадаўства сістэма медыяцыі існуе ў Расіі, Казахстане, большасці краін Еўропы і ў ЗША.
Як паведаміла кіраўнік цэнтра вырашэння канфліктаў Беларускага рэспубліканскага саюза юрыстаў Лілія Уласава, падчас рэалізацыі пілотнага праекта разгляд спрэчак пры дапамозе медыяцыі праводзіўся на бясплатнай аснове. Пасля прыняцця закона, хутчэй за ўсё, гэта працэдура будзе аплачвацца. «Але, як мы лічым, затраты будуць меншыя, чым дзяржпошліна, якую выплачваюць істцы для судовага разгляду спрэчак», — падкрэсліла яна.
