Хэнлан прызначаны галоўным трэнерам зборнай Беларусі па хакеі 4

Кантракт быў падпісаны 14 чэрвеня, аднак пра гэта Федэрацыя хакея абвясціла толькі сёння.

Пагадненне ўступае ў сілу 1 ліпеня і разлічана па формуле 2+1 (падпісана на два гады, а пры выкананні абавязацельстваў можа быць пралангавана на тых жа ўмовах яшчэ на год).

Хэнлан «ужо распрацаваў і прадставіў праграму развіцця падрыхтоўкі нацыянальнай зборнай да чэмпіянату свету 2014».

Згодна з умовамі кантракту ён возьме ўдзел не толькі ў працы з нацыянальнай зборнай, але і ў падрыхтоўцы стратэгіі развіцця маладзёжнага і юнацкага хакея.

Чакаецца, што канадзец прыбудзе ў Мінск у канцы ліпеня — пачатку жніўня пасля канчатковага ўзгаднення праграмы падрыхтоўкі зборных каманд на сезон 2013–2014.

Хэнлан трэніраваў зборную Беларусі па хакеі на чэмпіянатах свету 2005, 2006 і 2009 гадоў. На чэмпіянаце свету 2006 года ў Латвіі беларуская каманда заняла 6 месца.

Сезон 2009/2010 гадоў Хэнлан пачаў на пасадзе галоўнага трэнера «Дынама-Мінск», аднак 20 кастрычніка 2009 г. быў адпраўлены ў адстаўку з-за нездавальняючых вынікаў каманды. Праз два тыдні Хэнлан пакінуў пасаду галоўнага трэнера зборнай Беларусі.

У 2010–2011 гадах канадзец працаваў са зборнай Славакіі, але на чэмпіянатах свету не дабіўся з ёй значных поспехаў — 12-е і 10-е месцы.

У гэтым годзе беларуская каманда пад кіраўніцтвам Андрэя Скабелкі не змагла выйграць алімпійскі кваліфікацыйны турнір, а на чэмпіянаце свету заняла 14-е месца сярод 16 камандаў.

Дзмітрый Уласаў, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ