 |
Даклад па Беларусі падрыхтаваў італьянскі парлямэнтар Андрэа Рыгоні — спэцыяльны дакладчык у справах Беларусі. Ён прыяжджаў у Менск летась у кастрычніку.
Ад Беларусі ў Страсбург запрасілі дзьве дэлегацыі. Афіцыйныя ўлады прадстаўляюць сябры Нацыянальнага сходу Натальля Андрэйчык і Аляксандар Архіпаў, апазыцыю — Вінцук Вячорка і Віктар Карняенка. Абедзьвюм дэлегацыям дадуць магчымасьць выкласьці свае погляды сябрам Паліткамітэту.
На пытаньне «Радыё «Свабода», пра што ён зьбіраецца казаць эўрапейскім парлямэнтарам, першы намесьнік старшыні Партыі БНФ Вінцук Вячорка адказвае:
«Я пачну зь інфармацыі пра масавыя пасадкі моладзі. І пра тое, што цяпер на Акрэсьціна знаходзяцца лідэры прадпрымальнікаў, палітычных партыяў. І таксама моладзь — самая розная.
І што гэта ёсьць дастаткова ясны і недвухсэнсоўны сыгнал афіцыйных уладаў тым у Радзе Эўропы, хто слухаў іхныя байкі».
Такое ж пытаньне я задаў і старшыні камісіі ў справах заканадаўства і судова‑прававых пытаньнях Палаты прадстаўнікоў Аляксандру Архіпаву. Аднак ён спаслаўся на тое, што яшчэ не знаёмы з дакладам спадара Рыгоні:
«Шчыра кажучы, я яшчэ ня ведаю, што там будзе, як і навошта. А калі ня ведаеш, дык навошта тады казаць. Варажба — гэта ж самая няўдзячная рэч».
Палітоляг Аляксандар Лагвінец лічыць сёньняшняе паседжаньне ў Страсбуры выразнай прыкметай таго, што ў Эўропе дагэтуль існуе цікавасьць да Беларусі:
«Робяцца самыя розныя спробы хоць неяк урэгуляваць беларускае пытаньне. Зразумела, што і ўлада жадае тут весьці сваю гульню, паколькі яна хоча легітымізаваць свой так званы заканадаўчы орган міжнароднай супольнасьцю. Калі казаць пра зьмест дакладу спадара Рыгоні, дык той зьмест, зь якім я азнаёміўся, можна назваць даволі стрыманым. Канечне, у ім указваецца на пэўныя парушэньні правоў чалавека, хаця нават з дэклярацыяў спадара Рыгоні бачна, што ён хоча займець сабе, як і шмат хто зь іншых папярэдніх перамоўшчыкаў, ляўры чалавека, які знайшоў вырашэньне беларускага пытаньня. Хаця яно не такое ўжо і простае».
