 |
Dakład pa Biełarusi padrychtavaŭ italjanski parlamentar Andrea Ryhoni — specyjalny dakładčyk u spravach Biełarusi. Jon pryjaždžaŭ u Miensk letaś u kastryčniku.
Ad Biełarusi ŭ Strasburh zaprasili dźvie delehacyi. Aficyjnyja ŭłady pradstaŭlajuć siabry Nacyjanalnaha schodu Natalla Andrejčyk i Alaksandar Archipaŭ, apazycyju — Vincuk Viačorka i Viktar Karniajenka. Abiedźvium delehacyjam daduć mahčymaść vykłaści svaje pohlady siabram Palitkamitetu.
Na pytańnie «Radyjo «Svaboda», pra što jon źbirajecca kazać eŭrapiejskim parlamentaram, pieršy namieśnik staršyni Partyi BNF Vincuk Viačorka adkazvaje:
«Ja pačnu ź infarmacyi pra masavyja pasadki moładzi. I pra toje, što ciapier na Akreścina znachodziacca lidery pradprymalnikaŭ, palityčnych partyjaŭ. I taksama moładź — samaja roznaja.
I što heta jość dastatkova jasny i niedvuchsensoŭny syhnał aficyjnych uładaŭ tym u Radzie Eŭropy, chto słuchaŭ ichnyja bajki».
Takoje ž pytańnie ja zadaŭ i staršyni kamisii ŭ spravach zakanadaŭstva i sudova‑pravavych pytańniach Pałaty pradstaŭnikoŭ Alaksandru Archipavu. Adnak jon spasłaŭsia na toje, što jašče nie znajomy z dakładam spadara Ryhoni:
«Ščyra kažučy, ja jašče nia viedaju, što tam budzie, jak i navošta. A kali nia viedaješ, dyk navošta tady kazać. Varažba — heta ž samaja niaŭdziačnaja reč».
Palitolah Alaksandar Łahviniec ličyć siońniašniaje pasiedžańnie ŭ Strasbury vyraznaj prykmietaj taho, što ŭ Eŭropie dahetul isnuje cikavaść da Biełarusi:
«Robiacca samyja roznyja sproby choć niejak urehulavać biełaruskaje pytańnie. Zrazumieła, što i ŭłada žadaje tut vieści svaju hulniu, pakolki jana choča lehitymizavać svoj tak zvany zakanadaŭčy orhan mižnarodnaj supolnaściu. Kali kazać pra źmiest dakładu spadara Ryhoni, dyk toj źmiest, ź jakim ja aznajomiŭsia, možna nazvać davoli strymanym. Kaniečnie, u im ukazvajecca na peŭnyja parušeńni pravoŭ čałavieka, chacia navat z deklaracyjaŭ spadara Ryhoni bačna, što jon choča zajmieć sabie, jak i šmat chto ź inšych papiarednich pieramoŭščykaŭ, laŭry čałavieka, jaki znajšoŭ vyrašeńnie biełaruskaha pytańnia. Chacia jano nie takoje ŭžo i prostaje».
