У Гродне кіроўца ўседарожніка збіў і правёз на капоце міліцыянера, паведамляе МУС.
Участковы інспектар Ленінскага РАУС увечары 25 кастрычніка выйшаў з пад'езда дома. Ён убачыў, што мінак сфатаграфаваў яго службовы аўтамабіль, і паспрабаваў даведацца мэту здымкі. Просьбу мужчына праігнараваў і сеў у BMW X5. Затым паспрабаваў з'ехаць: збіў інспектара, працягнуў яго на капоце каля 10 м і скінуў на павароце.
Неўзабаве машыну затрымалі супрацоўнікі Гродзенскай памежнай групы ў пункце пропуску «Прывалка». Высветлілася, што за рулём быў 33-гадовы індывідуальны прадпрымальнік. Ён быў цвярозы, але патлумачыць прычыну свайго ўчынку не змог.
Завялі крымінальную справу за гвалт у дачыненні да супрацоўніка органаў унутраных спраў.
