«Zachoŭvańnie z metaj raspaŭsiudžvańnia». Za padpisku na ekstremisckija kanały pačali sudzić?
U sudovych zvodkach apošnim časam pišuć pra vypadki, kali ludziej karajuć za padpisku na ekstremisckija kanały. Što adbyvajecca nasamreč?
«Naša Niva» daviedałasia padrabiaźniej pra try takija vypadki. U dvuch ź ich ludzi byli padpisanyja na «niapravilnyja» kanały, ale asudzili ich nie za heta. A voś treci stvaraje niebiaśpiečny precedent sudovaha safizmu.
Tydzień tamu pa Baranavičach prajšła chvala zatrymańniaŭ. Paviedamlałasia, što niekatorych paśla asudzili za niapravilnyja padpiski — dali štraf abo sutki.
Jak raskazali nam svajaki adnaho z aryštavanych, da jaho prychodzili, bo pabačyli fota ŭ viełačacie ŭ padtrymku navinnaha partała, pryznanaha ekstremisckim. Fota było zroblenaje na fonie łahatypa partała.
Mužčyna taksama aktyŭna pisaŭ u miascovym rajonnym čacie.
U vyniku za raspaŭsiudžvańnie ekstremisckich materyjałaŭ jamu dali 15 sutak z kanfiskacyjaj telefona.
U kancy kastryčnika masavyja zatrymańni byli ŭ Homieli.
Dziaŭčyna, jakaja adsiedzieła 15 sutak «za padpisku», raskazvaje, što paśla zatrymańnia ŭ jaje asabistaj pierapiscy znajšli pierasłanaje paviedamleńnie z kanała Ściapana Puciły. U adkrytyja čaty jana repostaŭ nie rabiła.
Siłaviki čakali jaje kala ŭvachodu na pracu.
«Čamu mianie zatrymali, ja nie viedaju. Skazali, što ja pavinna dać pakazańni jak śviedka pa niejkaj kryminalnaj spravie, ale vidavočna ž, što śviedak tak nie zatrymlivajuć. «Tolki spačatku my chočam pahladzieć vaš telefon», — tak mnie skazali», — apisvaje dziaŭčyna.
Dahetul u jaje sudzimaściaŭ nie było — ni pa narodnym 24.23 (za niesankcyjanavanyja akcyi), ni pa inšych artykułach. Mahčyma, intares z boku siłavikoŭ byŭ vyklikany tym, što dziaŭčyna ź siamji aktyvistaŭ.
Treci vypadak adbyŭsia z žycharom Homielskaj vobłaści. Chłopca asudzili za padpisku na Instahram telekanała, pryznanaha ekstremisckim. Jaho asabisty profil byŭ adkryty. Voś jak arhumientavaŭ heta rajonny sud:
«Hramadzianin ź nieŭstanoŭlenaha času, znachodziačysia ŭ nieŭstanoŭlenym miescy, z vykarystańniem telefona z metaj raspaŭsiudžvańnia infarmacyjnaj pradukcyi zachoŭvaŭ u dadatku Instagram va ŭkładcy padpiski z volnym dostupam dla hramadzian destruktyŭnaha charaktaru spasyłku ŭ hrupu kanała, jakaja pa rašeńni suda pryznanaja ekstremisckaj.
Pry hetym akaunt u dadatku nie źjaŭlajecca schavanym, u suviazi z čym luby hramadzianin maje dostup da pakazanaj spasyłki».
Chłopcu dali piać sutak. Abvinavacili ŭ «zachoŭvańni z metaj raspaŭsiudžvańnia».
Jaho ŭžo zatrymlivali za palityku, tamu milicyjanty manitoryli jaho sacsietki. Vyklikali ŭ DAI i tam «pryniali». «Nie było bolš da čaho pryčapicca, voś i prydumali heta», — miarkuje chłopiec.
Raniej i jurysty, i sam HUBAZIK u aficyjnym kamientaryi kazali, što pakarańnie za padpisku na telehram-kanały, pryznanyja ekstremisckimi materyjałami, zakonam nie praduhledžanaje.
Čytajcie pa temie:
HUBAZiK: Padpiska na ekstremisckija telehram-kanały pakul nie karajecca
«Biełsat» — ekstremisckaje farmiravańnie. Što heta značyć dla ich aŭdytoryi?
«Supracoŭnik dastaŭ z kišeni stos bčb-nalepak — lapiŭ na mianie i viesialiŭsia». Jak składvajecca los biełarusaŭ-padpisantaŭ ekstremisckich kanałaŭ z pakajalnych videa?
